ఇంటిపట్టాల కోసం లబ్ధిదారుల ఆందోళన

తనకల్లు, జూన 2: ఇళ్లు లేని పేదలకు ఇంటి పట్టాలు మంజూరు చేయాలని సీపీఎం నాయకులు డిమాండ్‌ చేశారు. శుక్రవారం స్థానిక తహసీల్దార్‌ కార్యాలయం ఎదుట లబ్ధిదారులతో కలసి బైఠాయించారు. కార్యాలయంలోకి అధికారులు వెళ్లకుండా అడ్డుకున్నారు. ఈసందర్భంగా నాయకులు మాట్లాడుతూ పేదల ఇంటి పట్టాల కోసం పలుమార్లు అధికారులు చుట్టు తిరిగినా పట్టించుకునే నాథుడే లేడని వాపోయారు. ఇంటిపట్టాలు మంజూరు చేసేవరకు ఆందోళన విరమించేది లేదని భీష్మించారు. అనంతరం తహసీల్దార్‌ మధునాయక్‌కు వినతిపత్రం అందజేశారు. తహసీల్దార్‌ స్పందిస్తూ, గ్రామసచివాలయాల్లోని డిజిటల్‌ అసిస్టెంట్ల ద్వారా దరఖాస్తులు ఆనలైనలో పంపాలన్నారు. దీనికి లబ్ధిదారులు మాట్లాడుతూ, డిజిటల్‌ అసిస్టెంట్ల వద్దకు వెళ్లితే ఇక్కడ దరఖాస్తులు ఆనలైన చేయడానికి లేదని చెబుతున్నట్లు వాపోయారు. ఆనలైన నమోదుకు డిజిటల్‌ అసిస్టెంట్లను ఆదేశిస్తామని తహసీల్దార్‌ హామీ ఇచ్చారు. నిరసనలో సీపీఎం, రైతు సంఘం నాయకులు శివన్న, రమణ, లబ్ధిదారులు పాల్గొన్నారు.