AP News: ప్రేమ వేధింపులు తాళలేక అన్నదమ్ముల ఆత్మహత్యాయత్నం.. ఇంతకీ ఏం జరిగిందంటే?

విస్సన్నపేట: అమ్మాయి వ్యక్తిత్వం నచ్చకపోవడంతో దూరంగా పెట్టగా.. చివరకు ఆ యువతి చేసిన నిర్వాకానికి ఇద్దరు అన్నదమ్ములు తీవ్ర మనోవేదనకు గురై.. ఇక మాకీ బ్రతుకే వద్దన్న పరిస్థితికి తీసుకువచ్చిన ఘటన జిల్లాలో చోటు చేసుకుంది. ప్రేమ వేధింపులు తాళలేక ఇద్దరు అన్నదమ్ములు ఆత్మహత్యాయత్నానికి పాల్పడ్డారు. విస్సన్నపేటలో ఈ ఘటన చోటు చేసుకుంది. విస్సన్నపేటకు చెందిన ప్రేల మనోహర్ ములకలపాటి వారి గూడెం గ్రామానికి చెందిన గురజాల ప్రియాంకతో ఫేస్‌బుక్‌లో పరిచయం ఏర్పాడింది. ఈ పరిచయం ప్రేమగా మారింది. అయితే ప్రియాంక వ్యక్తిత్వం నచ్చకపోవడంతో మనోహర్ ఆమెను దూరం పెట్టాడు. దీంతో మనోహర్‌పై ప్రియాంక కేసు పెట్టగా.. కొంతకాలం మనోహర్ శిక్ష కూడా అనుభవించాడు. అనంతరం మనోహర్ ప్రియాంకకు దూరంగా వేరే ప్రాంతంలో జీవనం సాగిస్తున్నాడు.

అయితే మనోహర్ అన్న నరేష్‌పై కూడా ప్రియాంక విసన్నపేట పోలీసు స్టేషన్‌లో మరోసారి కేసు నమోదు చేసింది. అన్నదమ్ములపై ప్రియాంక వేధింపులు రోజురోజుకు ఎక్కువ అవ్వటంతో ఆ బాధలు తట్టుకోలేక నరేష్, మనోహర్ విసన్నపేటలో పురుగుల మందు తాగి బలవన్మరణానికి పాల్పడ్డారు. వీరిని గుర్తించిన కుటుంబసభ్యులు వెంటనే చికిత్స నిమిత్తం నూజివీడు ప్రభుత్వ ఆసుపత్రికి తరలించారు. ఆపస్మారకస్థితిలోకి వెళ్లిన ఇద్దరినీ మెరుగైన చికిత్స కోసం విజయవాడ ప్రభుత్వాస్పత్రికి తరలించారు. తమ పిల్లలు ఆత్మహత్య చేసుకోవటంతో తల్లి, మేనమామ తీవ్ర మనస్థాపనికి గురయ్యారు. విషయం తెలిసిన పోలీసులు ఈ ఘటనపై కేసు నమోదు చేసి దర్యాప్తు చేపట్టారు.