రూ. 50 లక్షల ప్రభుత్వ భూమి కబ్జాకు యత్నం

అడ్డుకున్న టీడీపీ నాయకులు, కార్యకర్తలు

పలమనేరు, డిసెంబరు 12: దీపం ఉండగానే ఇల్లు సర్దుకో అన్నవిధంగా తయారవుతున్నారు పలమనేరులోని కొందరు అఽధికారపార్టీ నేతలు. గంటావూరు సమీపంలోని బీసీ కాలనీ వద్ద ఉన్న గుట్టను చదును చేసి.. కబ్జా చేయడానికి స్కెచ్‌ వేశారు. ఈ గుట్టను తవ్వేందుకు మంగళవారం భారీ యంత్రం తీసుకొచ్చారు. రాళ్లను తరలించేందుకు ట్రాక్టర్లనూ సిద్ధం చేశారు. ఈ స్థలం విలువ రూ.50 లక్షలకుపైగా ఉంటుంది. ఇంటింటి తెలుగుదేశం కార్యక్రమానికి వెళ్లి తిరిగి వస్తున్న ఆ పార్టీ నాయకులు దీనిని గుర్తించి.. ఈ భూకబ్జాను అడ్డుకొన్నారు. రెవెన్యూ అధికారులకు ఫిర్యాదు చేశారు. దీంతో రెవెన్యూ అధికారులు పనులను నిలిపేశారు. ఈ భూకబ్జాకు పాల్పడిన వారిపై చట్టపరమైన చర్యలు తీసుకోవాలని టీడీపీ నాయకులు డిమాండు చేస్తున్నారు. లేని పక్షంలో ఈ భూకబ్జాలో రెవెన్యూ అధికారుల ప్రమేయం ఉందని భావించాల్సి వస్తుందన్నారు. అధికారులు గతంలోలాగే మళ్లీ అధికార పార్టీ కబ్జాదారులపక్షాన నిలిస్తే తాము ఆర్డీవో కార్యాలయం ముందు ఆందోళన చేపడతామని వారు హెచ్చరించారు. కాగా, ఏడాది కిందట కూడా ఈ కాలనీలో గుట్టలు గుట్టలుగా ఉన్న దాదాపు రెండు ఎకరాలకు పైగా స్థలాన్ని అధికార పార్టీనేతలు ఇష్టారాజ్యంగా చదును చేసి అమ్మకాలు చేసేసుకొన్నారు. ఇందులో రెవెన్యూ అధికారులు కూడా పాలుపంచుకొన్నట్లు అప్పట్లో ఆరోపణలు వచ్చాయి. తాజా ప్రయత్నాన్ని టీడీపీ నేతలు అడ్డుకున్నారు.