నిరుద్యోగులు అప్రమత్తంగా ఉండాలి: ఎస్పీ

రాజమహేంద్రవరం(ఆంధ్రజ్యోతి), జూన్‌ 12: నిరుద్యోగుల అవసరాన్ని అవకాశంగా తీసుకొని ఉద్యోగాలు ఇప్పిస్తామంటూ డబ్బులు వసూలు చేసి మోసగిస్తున్న కేటుగాళ్ల పట్ల నిరుద్యోగులు అప్రమత్తంగా ఉండాలని ఎస్పీ సుధీర్‌కుమార్‌రెడ్డి సూచించారు. మధ్యవర్తుల ముసుగులో కొంతమంది నిరుద్యోగుల నుంచి పెద్ద మొత్తాల్లో డబ్బులు వసూలు చేసి మోసగిస్తున్నారన్నారు. ఇలాంటి పలు కేసులు తమ దృష్టికి వచ్చాయన్నారు. ప్రభుత్వ, ప్రైవేటు ఉద్యోగాలు రాతపరీక్ష, ఇంటర్వ్యూ వంటి పక్రియ లేకుండా వచ్చే అవకాశం ఉండదన్నారు. ఉద్యోగాల విషయంలో నిరుద్యోగులకు ఏదైనా సందేహముంటే సంబంధిత ప్రభుత్వశాఖను లేదా సంస్థను సంప్రదించా లని సూచించారు. మోసగాళ్ల ఆటకట్టించడానికి ప్రత్యేక చర్యలు తీసుకుంటున్నామని ఎస్పీ తెలిపారు. ఉద్యోగాల కోసం డబ్బులు ఇవ్వడం కూడా నేరమని గుర్తుంచుకోవాలన్నారు. ఈ విషయంలో ఎవరికైనా సమాచారం ఉంటే పోలీసులకు తెలియజేయాలని కోరారు. కాగా.. సోమవారం ఎస్పీ కార్యాలయంలో నిర్వహించిన స్పందనకు 36 ఫిర్యాదులు అందాయి.