చిత్తగించండి..

వాడపల్లి ఆలయానికి.. డిప్యూటీ కమిషనర్‌ హోదా కోసం

ప్రభుత్వానికి ప్రతిపాదించిన దేవదాయ శాఖ

ఏడాదికి వార్షిక ఆదాయం రూ.15 కోట్లు

హోదా వస్తే పరిపాలనా పరమైన సౌలభ్యం పొందే అవకాశం

ఆత్రేయపురం, ఆగస్టు 13: రాష్ట్రంలో వార్షిక ఆదాయం రూ. 5 కోట్లు పైబడి వస్తున్న ఆలయాలకు డిప్యూటీ కమిషనర్‌ హోదా కల్పించేందుకు దేవదాయ శాఖ కమిషనర్‌ ప్రతిపాదనలు రూపొందించి ప్రభుత్వానికి నివేదించారు. ఏడాది కాలం నుంచి ఈ ప్రతిపాదనలు కార్యరూపం దాల్చడంలేదు. ఈ నెలలో జరగనున్న కేబినెట్‌ భేటీలో ఈ ప్రతిపాదనలు పరిపాలన ఆమోదం పొంది కేబినెట్‌ తీర్మానం ద్వారా డీసీ హోదా దక్కనున్నట్లు సమాచారం. ఉమ్మడి తూర్పుగోదావరి జిల్లాలోని ప్రసిద్ధ పుణ్యక్షేత్రాలైన అన్నవరం సత్యనారాయణస్వామి జాయింట్‌ కమిషనర్‌ హోదాలో నడుస్తుంది. అప్పనపల్లి బాలబాలాజీ, అంతర్వేది నరసింహస్వామి, మందపల్లి శనేశ్వరస్వామి, పెద్దాపురం మరిడమ్మ, కాకినాడ ఎంఎస్‌ఎన్‌ చార్టీస్‌, రాజమహేంద్రవరంలోని పందిరిమహాదేవుడు, కోటిలింగాల సత్రాలు సహాయ కమిషనర్‌ హోదాలో పరిపాలన సాగుతున్నాయి. వాడపల్లి శ్రీ వేంకటేశ్వరస్వామి పుణ్యక్షేత్రానికి ప్రతి శనివారం వివిధ రాష్ర్టాల నుంచి సుమారు 50 వేల మంది భక్తులు విచ్చేసి స్వామి వారికి ఏడు ప్రదక్షిణలు నిర్వహించుకుని దర్శించుకుంటున్నారు. రోజురోజుకు స్వామివారి ఖ్యాతి ఇనుమడింప చేయడంతో ఘననీయమైన ఆదాయం లభిస్తుంది. ఆలయంలో ప్రాకార మండప నిర్మాణంతో పాటు మాడ వీధులలో సీసీ రహదారులు భక్తులకు వివిధ సౌకర్యాలు కల్పిస్తున్నారు. రూ.4.50 కోట్లతో వకులమాత అన్నదాన భవనం నిర్మాణ దశలో ఉంది. రూ.2.80 కోట్లతో పుష్కరిణి అభివృద్ధికి నిధులుమంజూరయ్యాయి. స్వామి వారి వార్షిక ఆదాయం రూ.15 కోట్లు పైబడి లభిస్తుంది. ఈ ఆలయానికి డిప్యూటీ కమిషనర్‌ హోదా కోసం ప్రభుత్వానికి ప్రతిపాదనలు పంపించారు. డీసీ హోదా దక్కడం ద్వారా పరిపాలన సౌలభ్యంతో పాటు భక్తుల సమస్యలను సత్వరమే పరిష్కరిస్తూ అభివృద్ధి పనులపై సత్వరమే నిర్ణయం తీసుకునే అధికారం డిప్యూటీ కమిషనర్‌కు ఉంటుంది. కేబినెట్‌ ఆమోదం పొందితే డీసీ ఏలుబడిలో వెంకన్న ఆలయ పరిపాలన సాగనుంది.