వృద్ధురాలికి పెన్షన్‌ రాకుండా చేశారు..

నరసరావుపేట టౌన్‌, జనవరి 2: రొంపిచర్ల మండలం పరగటిచర్లలో 62 సంవత్సరాల మహిళకు వైసీపీ నాయకులు పెన్షన్‌ రాకుండా చేశారని టీడీపీ నరసరావుపేట నియోజకవర్గ ఇన్‌చార్జి డాక్టర్‌ చదలవాడ అరవిందబాబు అన్నారు. సోమవారం స్పందన కార్యక్రమంలో భాగంగా పల్నాడు జిల్లా కార్యాలయానికి వచ్చారు. ఈ సందర్భంగా ఆయన మాట్లాడుతూ కలెక్టర్‌ వెంటనే స్పందించి ఆమెకు పెన్షన్‌ మంజూరు చేశారన్నారు. రావిపాడులో 40 సెంట్ల అసైన్డ్‌ భూమిని వైసీపీ నాయకులు ఆక్రమించి ఇల్లు నిర్మించుకుంటున్నారని చెప్పారు. వారు చూపిన స్థల పట్టాలన్నీ ఫేక్‌ అని, కలెక్టర్‌ దృష్టికి తెచ్చామన్నారు. రావిపాడులోని ఇందిరాప్రియదర్శిని కాలనీలో మురుగుకాల్వ సదుపాయం లేదని, విద్యుత్‌ కనెక్షన్‌ లేదని, దోమలతో ఇబ్బంది పడుతున్నారని చెప్పారు. పట్టణంలో ఇబ్రహీంను హత్యచేసినప్పుడు వారి కుటుంబానికి అధికారులు ఇచ్చిన హామీ మేరకు రూ.25లక్షలు అందజేయాలని కలెక్టర్‌ను కోరామన్నారు. కార్యక్రమంలో మాజీ మార్కెట్‌ యార్డు చైర్మన్‌ పులిమి వెంకటరామిరెడ్డి, మాజీ ఎంపీపీ కడియం కోటిసుబ్బారావు, బాధితులు, ప్రజాసంఘాల నాయకులు పాల్గొన్నారు.