వైభవంగా బలిజపల్లె గంగమ్మ జాతర

వేలాదిగా పాల్గొన్న భక్తజనం

ప్రత్యేక పూజలు

రాజంపేట, జూలై 20: పట్టణంలోని బలిజపల్లె గంగమ్మ జాతర గురువారం అంగరంగ వైభవంగా నిర్వహించారు. వేలాదిగా భక్తజనం తరలిరావడంతో గంగమ్మ ఆలయ ప్రాంగణం చుట్టుపక్కల ప్రాంతాలు కిటకిటలాడాయి. ప్రధానంగా బలిజపల్లె నుంచి చుట్టుపక్కల అన్ని వీధులు సుమారు కిలోమీటరు మేర భక్తులతో నిండిపోయింది. రాజంపేట డీఎస్పీ చైతన్య ఆధ్వర్యంలో ఇరువురు సీఐలు, 8 మంది ఎస్‌ఐలు, 80 మంది పోలీసు సిబ్బందితో బందోబస్తు ఏర్పాటు నిర్వహించారు. ఎమ్మెల్యే మేడా మల్లికార్జునరెడ్డి, చైర్మన్‌ ఆకేపాటి అమర్‌నాధరెడ్డి, టీడీపీ నాయకుడు చమర్తి జగన్‌మోహన్‌రాజు తదితరులు గంగమ్మకు ప్రత్యేక పూజలు నిర్వహించారు. గురువారం తెల్లవారుజామున నుంచే సాంప్రదాయబద్ధంగా చీర, సారె పసుపు కుంకుమలు సమర్పించి అమ్మవారికి జంతు బలులు ఇచ్చి జాతరను నిర్వహించారు. పట్టణ పురవీధులు భక్తులతో కిటకిటలాడాయి. జనసేన నాయకులు మలిశెట్టి వెంకటరమణ ఆధ్వర్యంలో జాతరకు వెళ్లే భక్తులకు ఉచితంగా ఆటోలను ఏర్పాటు చేశారు. అనేక మంది భక్తులు అన్నదాన కార్యక్రమాలను, మజ్జిగ చలివేంద్రాలను, నీటి చలివేంద్రాలను ఏర్పాటు చేసి భక్తులకు పంపిణీ చేశారు.