రేపు రథోత్సవం

వన్‌టౌన్‌, ఫిబ్రవరి 17 : మహాశివరాత్రి సందర్భంగా వన్‌టౌన్‌ బ్రాహ్మణవీధిలోని శ్రీకన్యకాపరమేశ్వరి అన్నసత్రం కమిటీ ఆధ్వర్యంలో ఆదివారం సాయంత్రం 6 గంటలకు కెనాల్‌ రోడ్డులో రథోత్సవం నిర్వహిస్తున్నట్లు అన్నసత్ర కమిటీ అధ్యక్షుడు బచ్చు వెంకట లక్ష్మీవరప్రసాద్‌ తెలిపారు. బ్రాహ్మణ వీధిలోని అన్నసత్రం కమిటీ భవనంలో శుక్రవారం ఏర్పాటు చేసిన విలేకరుల సమావేశంలో ఆయన మాట్లాడారు. భ్రమరాంబ మల్లేశ్వరస్వామివార్ల దేవస్థానం, గంగా పార్వతీ సమేత వసంత మల్లిఖార్జునస్వామి ఆలయం, ఇంద్రకీలాద్రిపై దుర్గామల్లేశ్వరస్వామి దేవస్థానంలోని ఉత్సవ మూర్తులను ఊరేగింపుగా రథం సెంటరుకు తీసుకొచ్చి ప్రత్యేకంగా అలంకరించిన రథంపై అధిష్టింపజేస్తామని, అనంతరం రథోత్సవం ప్రారంభమవుతుందన్నారు. ఈ కార్యక్రమాన్ని సీపీ కాంతిరాణా ప్రారంభిస్తారని తెలిపారు.