ఎండ ప్రచండం

గురువారం కూడా అధిక ఉష్ణోగ్రతలు, వేడిగాలులు

ఉక్కపోతతో ఉక్కిరిబిక్కిరి

విజయవాడ, ఏప్రిల్‌ 13 (ఆంధ్రజ్యోతి) : భానుడు తన ప్రతాపాన్ని చూపిస్తున్నాడు. రెండు రోజులుగా నమోదైన ఉష్ణోగ్రతలను పరిశీలిస్తే గురువారం కాస్త తగ్గినా, వేడిగాలులు మాత్రం బాగానే వీచాయి. ఉదయం 9 గంటల నుంచే వాతావరణం వేడెక్కింది. సాయంత్రం 4 గంటల వరకు ప్రజలు రోడ్డు మీదకు రావడానికి భయపడిపోయారు. గురువారం విజయవాడలో 39.4 డిగ్రీల ఉష్ణోగ్రత నమోదైంది. మచిలీపట్నంలో 37.8, నందిగామలో 42.4 డిగ్రీల ఉష్ణోగ్రత నమోదైనట్టు వాతావరణ శాఖ తెలిపింది. రెండు జిల్లాల్లో శుక్రవారం కూడా అధిక ఉష్ణోగ్రతలు, వేడిగాలులు వీస్తాయని అధికారులు హెచ్చరించారు. కృష్ణాజిల్లాలో 11, ఎన్టీఆర్‌ జిల్లాలో 16 మండలాల్లో వడగాల్పులు ఉంటాయని పేర్కొన్నారు.