రాణి కుటుంబానికి బాసటగా టీడీపీ

నందివాడ, ఫిబ్రవరి 14 : తాడేపల్లిలో జగన్మోహన్‌రెడ్డి ఇంటికి కూత వేటుదూరంలో హత్యకు గురైన దళిత యువతి ఎస్తేరు రాణి(దివ్యాంగురాలు) పార్ధివదేహాన్ని అంత్యక్రియల నిమిత్తం కృష్ణాజిల్లా నందివాడ మండలం జనార్దనపురంలోని తండ్రి ఇంటి వద్దకు మంగళవారం అంత్యక్రియల నిమిత్తం తీసుకువచ్చారు. ఈ నేపథ్యంలో రాష్ట్ర తెలుగు మహిళా అధ్యక్షురాలు అనిత, గుడివాడ నియోజకవర్గ ఇన్‌చార్జ్‌ రావి వెంకటేశ్వరరావు ఎస్తేరు రాణి కుటుంబాన్ని పరామర్శించి రూ.2 లక్షల ఆర్థిక సాయం అందజేసి, వారి కుటుంబానికి తెలుగుదేశం పార్టీ అండగా ఉంటుందన్నారు. ఈ సందర్భంగా వంగలపూడి అనిత మాట్లాడుతూ జగన్‌ ప్రభుత్వంలో దళిత మహిళలకు రక్షణ కరువైందన్నారు. సీఎం ఇంటి పక్కనే దళిత మహిళలకు రక్షణ లేకపోతే మారుమూల ప్రాంతాలలో పరిస్థితి ఏంటని ప్రశ్నించారు. సీఎం అధికారంలోకి వచ్చినప్పటి నుంచి దళితులపై అత్యాచారాలు అధికమయ్యాయన్నారు. దళితుల పేరు చెప్పి అధికారంలోకి వచ్చి దళితులనే అణగదొక్కుతున్నారన్నారు. టీడీపీ నేత రామకృష్ణ అంధురాలి కుటుంబసభ్యులను పరామర్శించారు. నిందితుడిని వెంటనే అరెస్టు చేసి కఠినంగా శిక్షించాలని డిమాండ్‌ చేశారు.