TTD: నెట్టింట్లో వైరల్‌గా మారిన ‘ఓం నమో వేంకటేశాయా’

తిరుమల: ఏడుకొండల్లో కొలువైన తిరుమల (Tirumala) క్షేత్రానికి చేరుకుంటే మనసు హత్తుకునేలా వినిపించేది ‘ఓం నమో వేంకటేశాయా’ అనే జపం. క్యూలైన్‌లోకి ప్రవేశించిన భక్తులను ఆధ్యాత్మిక చింతన వైపు నడిపించేలా ఈ జపం వినిపిస్తూ ఉంటుంది. నిజానికి ఈ జపాన్ని దాదాపు 30 ఏళ్ల క్రితం పారుపల్లి రంగనాథ్‌ (Parupalli Ranganath) రూపొందించారు. అప్పటి నుంచి నేటి వరకు ఈజపం తిరుమలగిరులతో పాటు క్యూలైన్లలో వినిపిస్తూనే ఉంది. అయితే ప్రస్తుతం ఆ జపం సోషల్‌ మీడియా (Social media)లో వైరల్‌గా మారింది. ఓ టీవీ కార్యక్రమంలో యువ గాయని వైష్ణవి తన తల్లి మాధవిని పరిచయం చేసింది. ఈ క్రమంలో మాధవి మాట్లాడుతూ తాను కూడా సింగర్‌ అని, తిరుమలలో ప్రసారమవుతున్న ‘ఓం నమో వేంకటేశాయా’ అనే జపాన్ని చిన్న వయస్సులో పాడినట్టు వెల్లడించారు. ప్రస్తుతం ఆ వీడియో సోషల్‌ మీడియాలో వైరల్‌గా మారింది. శ్రీవారి దర్శనార్థం వచ్చే భక్తులు నిత్యం వినే ఆ జపాన్ని మాధవి పాడినట్టు తెలుసుకుని చాలామంది ఆశ్చర్యంగా వీడియో (Video)ను చూస్తూ షేర్లు కొడుతున్నారు.