Pawan Kalyan : అంత మంచి మాటలు అంబేద్కర్ కన్నా గొప్పగా ఎవరు చెప్పగలరు?

అమరావతి : ‘‘నేను, నా దేశం.. ఈ రెండింటిలో నా దేశమే అత్యంత ముఖ్యమైనది’ ఎంత గొప్ప మాటలు... ఇంత మంచి మాటలు బాబాసాహెబ్ అంబేద్కర్ కన్నా గొప్పగా ఎవరు చెప్పగలరు?’’ అంటూ జనసేన అధినేత పవన్ కల్యాణ్ ఓ ప్రకటనలో పేర్కొన్నారు. నేడు అంబేద్కర్ జయంతి సందర్భంగా ఆయనను స్మరించుకున్నారు. రాజ్యాంగమనే మహా సూత్రాలను భరత జాతికి అందించి.. ఈ దేశం సమైక్యంగా.. సమున్నతంగా.. సమభావంగా.. శక్తిమంతంగా.. ముందుకు సాగడానికి పద నిర్దేశం చేసిన దేశ భక్తుడు అని కొనియాడారు. అంబేద్కర్ వంటి మహా జ్ఞాని కోటికొక్కరు మాత్రమే ఉంటారని పవన్ పేర్కొన్నారు. ఆ మహనీయుని జయంతిని పురస్కరించుకుని వినమ్రంగా ప్రణామాలు అర్పిస్తున్నానన్నారు. ‘‘మేకల్ని బలి ఇస్తారు, కానీ పులులను బలి ఇవ్వరు, కాబట్టి పులుల్లా బతకండి’’ అని పేర్కొన్నారు. అణగారిన వర్గాలలో ధైర్యం నింపారన్నారు. అస్పృశ్యత, అంటరానితం నిర్మూలనకు తన జీవిత చరమాంకం వరకూ అవిరళ కృషి చేసి అసామాన్యునిగా నిలిచారన్నారు. శాంతిమూర్తి బాబాసాహెబ్ అంబేద్కర్ గారికి నివాళి అర్పిస్తున్నానని పవన్ తెలిపారు.