రక్షణ స్తంభాల నాణ్యత ఘోరం
ABN , First Publish Date - 2023-07-06T00:41:06+05:30 IST
మండలంలోని వనుగుమ్మ నుంచి రంగబయలు మీదుగా జోడిగుమ్మ వరకు నిర్మించిన రహదారి విషయంలో నాణ్యతాలోపాలు బయటపడుతున్నాయి.
వనుగుమ్మ- జోడిగుమ్మ ఘాట్‌ రోడ్డు మలుపు వద్ద నేలకొరుగుతున్న సిమెంట్‌ స్తంభాలు
తేలికపాటి వర్షానికే ధ్వంసమవుతున్న వైనం
ముంచంగిపుట్టు, జూలై 5: మండలంలోని వనుగుమ్మ నుంచి రంగబయలు మీదుగా జోడిగుమ్మ వరకు నిర్మించిన రహదారి విషయంలో నాణ్యతాలోపాలు బయటపడుతున్నాయి. ప్రధానమంత్రి గ్రామ సడక్‌ యోజన పథకం కింద పంచాయతీరాజ్‌ శాఖ రూ.16.9 కోట్లు వెచ్చించి వనుగుమ్మ నుంచి రంగబయలు పంచాయతీ కేంద్రం మీదుగా జోడిగుమ్మ వరకు నిర్మించిన రహదారి ఇటీవల కురిసిన వర్షాలకు పలు చోట్ల దెబ్బతిన్న విషయం తెలిసిందే. కాగా ప్రస్తుతం కురుస్తున్న వర్షాలకు ఈ మార్గంలో మలుపుల వద్ద ఉన్న సిమెంట్‌ రక్షణ స్తంభాలు పలుచోట్ల నేలకొరిగాయి.
మూడు నెలలకే దెబ్బతింటున్న స్తంభాలు
ఈ మార్గంలో సిమెంట్‌ రక్షణ స్తంభాలు ఏర్పాటు చేసి మూడు నెలలే కావస్తున్నది. వాస్తవానికి ఘాట్‌ మార్గంలో మట్టి కాస్త లూజుగా ఉంటుంది. సుమారు అడుగు లోతు తీసి కాంక్రీట్‌తో సిమెంట్‌ రక్షణ స్తంభాలను ఏర్పాటు చేయాలి. అయితే ఇక్కడ చిన్న గొయ్యి తీసి అందులో సిమెంట్‌ స్తంభాలు నిలబెట్టినట్టు తెలిసింది. అది కూడా రెండు, మూడు సన్నపాటి ఇనుప ఊచలు వేసి సిమెంట్‌ స్తంభాలను తయారు చేసినట్టు తెలుస్తోంది. అందుకే తేలికపాటి వర్షం కురిసినా అవి నేలకొరిగిపోతున్నాయి. రహదారితో పాటు రక్షణ స్తంభాలు నాణ్యత లేకుండా ఉన్నాయని స్థానికులు ఆవేదన వ్యక్తం చేస్తున్నారు. మలుపుల వద్ద ప్రమాదాలు జరగకుండా ఏర్పాటు చేయాల్సిన రక్షణ స్తంభాల విషయంలో కూడా కాంట్రాక్టరు నిర్లక్ష్యంగా వ్యవహరించారని మండిపడుతున్నారు. అధికారులు స్పందించి ఈ రహదారితో పాటు రక్షణ స్తంభాల నాణ్యతపై దృష్టి సారించి తగిన చర్యలు తీసుకోవాలని కోరుతున్నారు.
