ఉగాది నాటికి లక్ష్యాలు పూర్తి చేయాలి

కలెక్టర్‌ ప్రసన్న వెంకటేశ్‌ ఆదేశం

ఏలూరు కలెక్టరేట్‌, మార్చి 11 : జిల్లాలో పేదలందరికి ఇళ్ల పథకం కింద ఉగాది నాటికి నిర్ధేశించిన లక్ష్యాలను ఎట్టిపరిస్థితుల్లోనూ పూర్తిచేయాలని జిల్లా కలెక్టర్‌ ప్రసన్న వెంకటేశ్‌ గృహ నిర్మాణ శాఖ అధికారులను ఆదేశించారు. కలెక్టరేట్‌లో పేదలందరికి ఇళ్లు కార్యక్రమం ప్రగతిలో వెనుకబడ్డ మండలాల అధికారులతో ప్రత్యేకంగా ఆయన సమీక్ష నిర్వహించారు. ఈ సందర్భంగా ఆయన మాట్లాడుతూ నవరత్నాలు కార్యక్రమంలో పేదలందరికి ఇళ్లు పథకాన్ని ప్రభుత్వం అమలు చేస్తుందని, ప్రభుత్వం అందించే ప్రోత్సాహాన్ని లబ్ధిదారులకు తెలిపి ఇళ్ల నిర్మాణ ప్రగతిని మరింత పెంచాలన్నారు. ఈ కార్యక్రమం అమలులో అధికారులు, సిబ్బంది అలసత్వం వీడాలన్నారు. లక్ష్యాన్ని సాధించని అధికారులపై చర్యలు తీసుకుంటామని హెచ్చరించారు. నూజివీడు, మండవల్లి, ఆగిరిపల్లి, కలిదిండి, కైకలూరుల్లో పేదలందరికీ ఇళ్ల పథకం ప్రగతి తక్కువగా ఉందని అన్నారు. డీఆర్వో ఏవీఎస్‌ఎన్‌ మూర్తి, గృహనిర్మాణశాఖ పీడీ వేణుగోపాల్‌, మండల తహసీల్దార్లు, ఎంపీడీవోలు, ఇంజనీర్లు తదితరులు పాల్గొన్నారు.