Chintamaneni: జగన్.. మీ తాత దిగొచ్చినా ఏం చేయలేరు...

ఏలూరు: టీడీపీ (TDP) సీనియర్ నేత చింతమనేని ప్రభాకర్‌ (Chintamaneni Prabhakar) పట్ల పశ్చిమగోదావరి జిల్లా (West Godavari Dist.) పోలీసులు అత్యంత దురుసుగా ప్రవర్తించారు. ఈ సందర్బంగా ఆయన మీడియాతో మాట్లాడుతూ వైసీపీ ప్రభుత్వం (YCP Govt.) టీడీపీ నేతలందరినీ టార్గెట్ (Target) చేసిందన్నారు. ఇతర రాజకీయ నేతలు

ఎవరైనా మీడియా సమావేశంలో వైసీపీ ప్రభుత్వం వైఫల్యాలను, చేతగానితనాన్ని ప్రశ్నించినా.. విమర్శించినా.. వాళ్ల పరిస్థితి కూడా చింతమనేనిలా ఉంటుందని చెప్పేందుకే తనను టార్గెట్ చేసిందని అన్నారు. టీడీపీ 40 ఏళ్ల చరిత్ర ఉన్న పార్టీ అని.. అధికారం ఉన్నా, లేకపోయినా ప్రజాక్షేత్రంలో కొట్లాడుతున్న పార్టీ అని అన్నారు. ‘నువ్వు కాదు.. నీ తాత దిగొచ్చినా’ టీడీపీని ఏమీ చేయలేరని సీఎం జగన్‌ను ఉద్దేశించి అన్నారు. రేపు అధికారంలోకి రాబోయేది టీడీపీయేనని చింతమనేని ప్రబాకర్ ఆశాభావం వ్యక్తం చేశారు.

టీడీపీ సీనియర్ నేత చింతమనేని ప్రభాకర్‌ సోమవారం బ్లడ్ శాంపిల్స్ ఇచ్చేందుకు ఏలూరు ప్రభుత్వాస్పత్రికి వచ్చారు. రేపు తన పుట్టిన రోజు సందర్భంగా రక్తదానం చేసేందుకు సిద్ధమయ్యారు. అయితే ముందుగా బ్లడ్ శాంపిల్స్ ఇచ్చేందుకు చింతమనేని తన అనుచరులతో ఆస్పత్రికి వచ్చారు. అయితే హరిరామజోగయ్య (Chegondi Venkata Harirama Jogaiah)ను పరామర్శించేందుకే ఆస్పత్రికి వచ్చారన్న అనుమానంతో లోపలకు వెళ్లకుండా గేటు దగ్గరే పోలీసులు నిలువరించి అనుచితంగా వ్యవహరించారు. దీంతో చింతమనేని వర్గీయులు పోలీసులతో వాగ్వాదానికి దిగారు. పరిస్థితి ఉద్రిక్తంగా మారడంతో చింతమనేనిని పోలీసులు అదుపులోకి తీసుకుని స్టేషన్‌కు తరలించి విడిచిపెట్టారు. పోలీసుల తీరును నిరసిస్తూ అమరావతి కేంద్ర టీడీపీ పార్టీ కార్యాలయానికి చేరుకొని నిరసన తెలియజేశారు. బర్త్ డే సందర్భంగా దెందులూరులో చింతమనేని రక్తదాన శిబిరాన్ని ఏర్పాటు చేశారు. ఆ ఏర్పాట్లను అడ్డుకున్న పోలీసులు చింతమనేని చొక్కా చించివేశారు. పోలీసుల తీరుపై చింతమనేని మండిపడ్డారు.