Elon Musk: టాయిలెట్ బ్రేక్‌లో మైక్ మ్యూట్ చేయడం మర్చిపోయిన వివేక్ రామస్వామి.. మస్క్ రియాక్షన్ ఏంటంటే..

రిపబ్లికన్ పార్టీ తరఫున అమెరికా అధ్యక్ష అభ్యర్థిత్వ (Republican presidential candidate ) బరిలో ఉన్న వివేక్ రామస్వామి (Vivek Ramaswamy), ఎక్స్ అధినేత ఎలన్ మస్క్ (Elon Musk) మధ్య జరిగిన సంభాషణకు సంబంధించిన ఆడియో (Vivek Ramaswamy Audio) సోషల్ మీడియాలో వైరల్ (Viral) అవుతోంది. ప్రచారంలో భాగంగా వివేక్ రామస్వామి ఇటీవల ``ఎక్స్ స్పేషేస్`` (X Spaces) అనే అన్‌లైన్ చర్చా వేదికలో పాల్గొన్నారు. ఈ లైవ్ ఆడియోను ఎలన్ మస్క్, పాపులర్ రేడియో వ్యాఖ్యాత అలెక్స్ జోన్స్‌తో పాటు 23 లక్షల మంది శ్రోతలు విన్నారు. ఆ సమయంలో చోటు చేసుకున్న ఓ ఘటన చర్చనీయాంశంగా మారింది.

ఎలన్ మస్క్, వివేక్ రామస్వామి మాట్లాడుతుండగా బ్యాగ్రౌండ్లో నీళ్ల శబ్దం వినిపించింది. దీంతో ఎవరో టాయిలెట్‌లోకి వెళ్లినపుడు కూడా మైక్ (Mike) ఆన్‌లో ఉంచారని అర్థమైంది. స్క్రీన్‌పై వివేక్ రామస్వామి మైక్ మాత్రమే ఆన్‌లో ఉన్నట్టు చూపించింది. వెంటనే వివేక్ రామస్వామి తన మైక్‌ను మ్యూట్ చేశారు. అనంతరం శ్రోతలందరికీ క్షమాపణలు చెప్పారు. కాసేపటి తర్వాత ఈ ఘటనపై మస్క్ స్పందిస్తూ.. ``మీరు ఇప్పుడు కాస్త స్థిమితపడ్డారా?`` అని వివేక్‌ను ఉద్దేశించి అన్నారు. ``అవును.. బాగానే ఉన్నాను.. అలా జరిగినందుకు అందరికీ క్షమాపణలు చెబుతున్నా`` అని వివేక్ బదులిచ్చారు.

మస్క్, వివేక్ రామస్వామి మధ్య జరిగిన ఈ సంభాషణకు సంబంధించిన ఆడియో సోషల్ మీడియాలో వైరల్‌గా మారింది. ఈ ఆడియోపై నెటిజన్లు స్పందిస్తున్నారు. ``లైవ్ షోలలో ఇలాంటివి జరగడం సర్వ సాధారణం``, ``ఇదో సరదా ఘటన``, ``ఈ ఘటన వివేక్‌ను చాలా కాలం వెంటాడుతుంది``, ``వివేక్ కాస్త ఇబ్బంది పడి ఉంటారు`` అంటూ నెటిజన్లు కామెంట్లు చేశారు.