NRI: దుస్తులు విప్పి ఇంటర్వ్యూలో పాల్గొన్న యువతులు.. కువైత్ ఎయిర్‌వేస్‌పై విమర్శలు..

ఎన్నారై డెస్క్: కువైత్ ఎయిర్‌వేస్‌లో(Kuwait Airways) ఎయిర్ హోస్టస్(Flight Attendants) ఉద్యోగాలకు దరఖాస్తు చేసుకున్న యువతులు దుస్తులు విప్పి ఇంటర్వ్యలో పాల్గొన్నారన్నా వార్త కలకలం రేపుతోంది. స్పెయిన్‌లో(Spain) గత నవంబర్‌లో ఇంటర్వ్యూల సందర్భంగా ఈ దారుణం జరిగిందని ఓ మహిళా అభ్యర్థి ఆరోపించారు. తమ ఒంటిపై టాటూలు, ఇతర మచ్చలు ఏమైనా ఉన్నాయో లేదో తెలుసుకునేందుకు దుస్తులు విప్పించారని ఆవేదన వ్యక్తం చేశారు. లోదుస్తులు మినహా ఒంటిపై నూలుపోగు లేకుండా తాము నిలబడాల్సి వచ్చిందని వాపోయారు. తమను ఇంటర్వ్యూ చేసిన వారు పలు అభ్యంతరకర వ్యాఖ్యలు చేశారని చెప్పారు. నవ్వు బాలేదని, శరీరాకృతి సరిగాలేదని హీనమైన కామెంట్స్ చేశారన్నారు. కువైత్ ఎయిర్‌వేస్ తరపున ఓ రిక్రూట్‌మెంట్ ఏజెన్సీ ఈ ఇంటర్వ్యూలు నిర్వహించింది. దీంతో.. కువైత్‌ కూడా విమర్శల పాలైంది.

ఈ ఆరోపణలపై సమగ్ర దర్యాప్తునకు ఆదేశించామని కువైత్ ఎయిర్ వేస్ తాజాగా పేర్కొంది. గత ఐదేళ్లుగా ఆ సంస్థతే తమ తరపున ఉద్యోగనియామక ప్రక్రియ చేపడుతోందని తెలిపింది. స్పెయిన్‌లోని ఇతర విమానయాన సంస్థలూ ఇదే ఏజెన్సీ సేవలు వినియోగించుకుంటున్న విషయాన్ని ప్రస్తావించింది. ఇలాంటి ఆరోపణలు ఎప్పుడూ రాలేదని విభ్రాంతి వ్యక్తం చేసిన కువైత్ ఎయిర్‌వేస్.. ఈ చర్యలను అస్సలు సహించమని స్పష్టం చేసింది. దర్యాప్తు నివేదిక ఆధారంగా బాధ్యులపై చర్యలు తీసుకుంటామని ప్రకటించింది. స్పెయిర్ కార్మిక శాఖ కూడా ఈ ఆరోపణలపై దర్యా్ప్తు ప్రారంభించింది.