భవిష్య బద్రి ఆలయానికి ఆ పేరు ఎందుకు వచ్చిందో తెలిస్తే..
ABN , First Publish Date - 2023-01-19T09:45:19+05:30 IST
భవిష్య బద్రి ఆలయం జోషిమఠ్‌కు 21 కిలోమీటర్ల దూరంలో ఉంది. ఇది ఎంతో పురాతన ఆలయంగా పేరొందింది. ఈ ప్రదేశంలో బద్రీ స్వామిని పూజిస్తారు.
భవిష్య బద్రి ఆలయం జోషిమఠ్‌కు 21 కిలోమీటర్ల దూరంలో ఉంది. ఇది ఎంతో పురాతన ఆలయంగా పేరొందింది. ఈ ప్రదేశంలో బద్రీ స్వామిని పూజిస్తారు. ఉత్తరాఖండ్‌లోని బద్రినాథ్ ధామ్‌తో పాటు, చార్‌ధామ్ యాత్రలో గంగోత్రి, యమునోత్రి, కేదార్‌నాథ్ ఉన్నాయి. బద్రీక్షేత్ర ప్రాంతంలో విష్ణువు కొలువైన ఐదు ఆలయాలు ఉన్నాయి, వీటిని పంచ బద్రి అని పిలుస్తారు. బద్రీనాథ్ ఆలయం కాకుండా, యోగధ్యాన్ బద్రి, భవిష్య బద్రి, వృద్ధ బద్రి, ఆది బద్రి దేవాలయాలన్నాయి.
భవిష్య బద్రి ఆలయం గురించి అనేక పురాణ కథలు ఉన్నాయి. భవిష్య బద్రీ స్వామిని పూజించే పూజారి కాలు బాబా ఈ ఆలయానికి సంబంధించిన వివరాలు తెలియజేశారు. భవిష్య బద్రి ఆలయం తపోవన్‌కు అవతలి వైపు మరియు ధౌలిగంగా నది సమీపంలో ఉంది, ఇది దట్టమైన అడవుల మధ్య ఉంది. ధౌలిగంగ బలమైన ప్రవాహంతో తపోవనానికి రెండు వైపులా ఉన్న రాళ్ల గుండా వెళుతుంది.
కలియుగం అంతంలో జోషిమఠ్‌లోని నరసింహ విగ్రహంలోని హస్తం పడిపోతుందని, జయ, విజయ పర్వతాలు విష్ణుప్రయాగ సమీపంలో కుంగిపోతాయని చెబుతారు. తద్వారా బద్రీనాథ్ ధామ్‌కు వెళ్లే మార్గం మూసుకుపోతుందట. ఫలితంగా బద్రీనాథ్.. భవిష్య బద్రిలో పూజలందుకుంటాడని చెబుతారు. విష్ణువు కల్కి అవతారాన్ని ముగించాక సత్యయుగం ప్రారంభమవుతుందట. ఆ సమయంలో బద్రీనాథ్ ధామ్ పునరుద్ధరణ జరుగుతుందని స్థానికులు భావిస్తారు.
