Hampi: హంపిలో విదేశీయుల విహారం

- శిల్ప కళా సౌందర్య ఆస్వాదన

- ఉత్సాహంగా జీ-20 సాంస్కృతిక సమావేశాలు

బళ్లారి(బెంగళూరు), (ఆంధ్రజ్యోతి): ప్రపంచ ప్రఖ్యాతి గాంచిన హంపి(Hampi)లోని శిల్ప కళా సంపదకు విదేశీయులు ముగ్ధులవుతున్నారు. శిల్పకళా అద్భుతాలను చూసి మురిసిపోతున్నారు. జీ-20 సదస్సులో భాగంగా హంపిలో జరుగుతున్న సాంస్కృతిక కార్యక్రమాలకు హాజరైన విదేశీ ప్రతినిధులు ఇక్కడి అందాలను చూసి ఆనందపడుతు న్నారు. శ్రీకృష్ణదేవరాయల ఆస్థానమయిన హంపి జీ-20 సదస్సులకు వేదిక అయింది. ఇందులో భాగంగా 20 దేశాలకు చెందిన అధికారులు, ప్రతినిధులు పాల్గొంటున్నారు. మంగళవారం విదేశీయులు ఆనేశాల, లోటస్‌ మహల్‌, రాణి స్నానపు గది తదితర ప్రాంతాల్లో విహరించారు. రాణి స్నానపు గది వద్ద విదేశీయులు మొక్కలు నాటారు. హంపి(Hampi)లోని అద్భుత శిలలు, వాటిపై చెక్కిన చిత్రాలు చూసి ఆశ్చర్యపోయారు. ఈ సందర్భంగా హంపిలో నిర్వహించిన సాంస్కృతిక కార్యక్రమాలు అలరించాయి. విరూపాక్షిస్వామి ఆలయం ఎదురుగా ఉన్న ఎదురు బసవణ్ణ మండపంపై వివిధ ప్రాంతాల నుంచి వచ్చిన నాట్య కళాకారుల విన్యాసాలు విదేశీయులను కనువిందు చేశాయి. చందమామ చల్లటి నీడలో ఆకాశంపై ధృవతారలు ప్రకాశిస్తుంటే.. నేలపై గజ్జికట్టి నాట్యం ఆడుతున్న కళాకారులను చూసి ప్రపంచ దేశస్తులు ఆనందంతో మునిగిపోయారు.