Success Story: ఎవరీ దంపతులు..? ఒకప్పుడు భార్య సంపాదన మీదే ఆధారపడిన భర్త.. ఇప్పుడు ఏకంగా రూ.19 వేల కోట్ల ఆస్తి..!

వారిద్దరూ కలిసి చదువుకున్నారు.. అహ్మదాబాద్ ఇండియన్ ఇన్‌స్టిట్యూట్ ఆఫ్ మేనేజ్‌మెంట్‌ (IIM Ahmedabad)లో క్లాస్‌మేట్స్.. తర్వాత ప్రేమించి పెళ్లి చేసుకున్నారు.. ఇద్దరూ మంచి కంపెనీల్లో ఉద్యోగాల్లో జాయిన్ అయ్యారు.. అయితే ఆ యువకుడికి ఉద్యోగం చేయడం నచ్చలేదు.. దాంతో ఉద్యోగం మానేసి ఓ చిన్న కంపెనీ ప్రారంభించాడు.. ఎన్నో సంవత్సరాలు సంపాదన లేకుండా గడిపాడు.. భార్య జీతం మీదనే కుటుంబం నడిచేది.. ఆ తర్వాత అతను స్థాపించిన కంపెనీ విజయవంతమై ఏకంగా రూ. 57 వేల కోట్ల సంస్థగా అవతరించింది.. ఆ వ్యక్తి సంపద ఏకంగా రూ.19 వేల కోట్లకు చేరింది.. ఆ వ్యక్తి మరెవరో కాదు.. ఇన్ఫో‌ఎడ్జ్ (Info Edge) కంపెనీ వ్యవస్థాపకుడు సంజీవ్ (Sanjeev Bikhchandani).

ఐఐఎమ్‌లో కలిసి చదువుకున్న సంజీవ్, సురభి (Surabhi Bikhchandani) 1990లో వివాహం చేసుకున్నారు. చదువు తర్వాత ఇద్దరికీ మంచి ఉద్యోగాలు వచ్చాయి. అయితే సంజీవ్ ఆ ఉద్యోగంలో కొనసాగలేకపోయాడు. వ్యాపార రంగంలో ఎదగాలనేది అతడి కల. దీంతో ఉద్యోగం మానేసి తన ఇంటి గ్యారేజ్‌లో సెకెండ్ హ్యాండ్ కంప్యూటర్లు, ఫర్నిచర్‌తో ``ఇన్ఫో‌ఎడ్జ్`` సంస్థను స్థాపించాడు. 6 సంవత్సరాలు సంపాదన లేకుండా గడిపాడు. ఆ సమయంలో సురభి సంపాదనతోనే ఇల్లు గడిచింది. 1997లో నౌకరీ.కామ్‌‌ (Naukri.com)ను ప్రారంభించిన తర్వాత సంజీవ్ దశ తిరిగింది. నౌకరీ.కామ్‌‌ సూపర్ సక్సెస్ అయింది (Success Story).

ఆ విజయంతో సంజీవ్ వెనక్కి తిరిగి చూసుకోలేదు. ఆ తర్వాత జీవన్‌సాథీ.కామ్, 99ఏకర్స్.కామ్, శిక్ష.కామ్‌లను ప్రారంభించి సక్సెస్ చేశారు. ఆ తర్వాత సంజీవ్ ``ఇన్ఫో‌ఎడ్జ్`` సంస్థ ``జొమాటో``, (Zomato) ``పాలసీ బజార్`` (Policy Bazaar)వంటి స్టార్టప్‌ల్లో పెట్టుబడి పెట్టి భారీ లాభాలు ఆర్జించింది. ప్రస్తుతం ``ఇన్ఫో‌ఎడ్జ్`` మార్కెట్ క్యాపిటల్ రూ.57,500 కోట్లు. ఫోర్బ్స్ ప్రకారం సంజీవ్ వ్యక్తిగత ఆస్తుల విలువ రూ.19 వేల కోట్లు. సురభి వ్యక్తిగత ఆస్తుల విలువ రూ.920 కోట్లు.