Nandamuri Kalyanram: బాబాయ్‌పై అబ్బాయ్ ప్రశంసలు

నందమూరి బాలకృష్ణ హీరోగా నటించిన సినిమా ‘వీరసింహా రెడ్డి’ (Veera Simha Reddy). ఈ చిత్రం ప్రపంచవ్యాప్తంగా జనవరి 12న విడుదల కాగా అభిమానులు బ్రహ్మారథం పట్టారు. బాక్సాఫీస్ వద్ద ఈ సినిమా బ్లాక్ బాస్టర్ వసూళ్లతో దూసుకుపోతుంది. ‘వీరసింహా రెడ్డి’ పై తాజాగా నందమూరి కల్యాణ్ రామ్ (Nandamuri Kalyanram) ప్రశంసల వర్షం కురిపించారు. బాబాయ్‌ను పొగుడుతూ సోషల్ మీడియాలో ఓ పోస్ట్ పెట్టారు. ‘‘ఈ ఏడాది అద్భుతంగా ఆరంభమైంది. బ్లాక్ బాస్టర్ విజయాన్ని అందుకున్నందుకు వీరసింహా రెడ్డి చిత్ర బృందానికీ శుభాకాంక్షలు. ఎప్పటి మాదిరిగానే తన నటనతో బాబాయ్ ప్రేక్షకులను అలరించారు’’ అని కల్యాణ్ రామ్ ట్విట్టర్‌లో పోస్ట్ పెట్టారు. ఈ ట్వీట్ నెట్టింట వైరల్‌గా మారింది. అభిమానులందరు షేర్ చేసుకోవడం మొదలుపెట్టారు.

‘వీరసింహా రెడ్డి’ ని మైత్రీ మూవీ మేకర్స్ భారీ బడ్జెట్ తో రూపొందించింది. గోపిచంద్ మలినేని ఈ సినిమాకు దర్శకత్వం వహించారు. శ్రుతి హాసన్ హీరోయిన్ గా నటించారు. దునియా విజయ్, వరలక్ష్మీ శరత్ కుమార్, హానీ రోజ్, చంద్రికా రవి తదితరులు ఈ చిత్రంలో కీలక పాత్రలు పోషించారు. బాలకృష్ణ కెరీర్‌లోనే ఈ మూవీ అత్యధికంగా ప్రీ రిలీజ్ బిజినెస్ చేసింది. అందుకు తగ్గట్టుగానే ఈ సినిమా వరల్డ్ వైడ్‌గా రూ.40కోట్లకు గ్రాస్ వసూళ్లను సాధిస్తుందని ట్రేడ్ పండితులు పేర్కొంటున్నారు. వీరసింహారెడ్డి సినిమాను వర్జీనియాలోని ఓ థియేటర్‌లో ప్రదర్శించగా అభిమానులు భారీ ఎత్తున సంబరాలు చేసుకున్నారు. గాల్లో కాగితాలను ఎగురవేస్తూ తమ అభిమానాన్ని చూపించారు. ఫలితంగా థియేటర్ యజమాన్యం జోక్యం చేసుకుంది. సినిమాను అర్ధాంతరంగా రద్దు చేసింది. ప్రేక్షకులందరు థియేటర్‌ను విడాలని కోరింది.