ఆ జంతువులో అంత గొప్పదనం ఏముందని... అంతలా అక్రమ రవాణా అవుతోంది?.. ఒక్కో జంతువు ఖరీదెంతంటే...

అరుదైన జంతువుల అక్రమ రవాణా విరివిగా జరుగుతుంటుంది. వాటిలో ఒకటే పాంగోలిన్(Pangolin). అంటే అలుగు. పర్యావరణ పరిశోధనా సంస్థ (EIA) తన నివేదికలలో పాంగోలిన్ అనే అడవి జంతువుకు సంబంధించిన పలు ఆశ్చర్యకరమైన విషయాలు వెల్లడించింది. పాంగోలిన్ శరీరంతో తయారు చేసిన ఉత్పత్తులను పలు ఆన్‌లైన్ సైట్‌లు(Online sites) విక్రయిస్తున్నాయని ఈ ఏజెన్సీ ఆరోపించింది.

వీటిలో ఔషధాలను(Medicines) విక్రయించే వెబ్‌సైట్లు కూడా ఉన్నాయి. పాంగోలిన్ కీటకాలను తినే క్షీరద జంతువు. ఈ ప్రత్యేక జీవి ఆఫ్రికా, ఆసియాలోని దట్టమైన అడవులలో కనిపిస్తుంది. చూసేందుకు ఇవి సరీసృపాలల(Reptiles) మాదిరిగా కనిపిస్తాయి. పాంగోలిన్ నాలుక సుమారు 40 సెంటీమీటర్ల పొడవు ఉంటుంది. ఆ నాలుక సహాయంతో చీమలు, చెదపురుగులు, చిన్న కీటకాలను తింటుంది. ఒక పాంగోలిన్ ప్రతి సంవత్సరం సుమారు 70 మిలియన్ కీటకాలను(Insects) తింటుంది.

ప్రపంచంలో దాదాపు 8 రకాల పాంగోలిన్‌లు ఉన్నాయి. వాటిలో ఐదు జాతులు రాబోయే కాలంలో అంతరించిపోయే ప్రమాదం ఉందని పరిశోధకులు(Researchers) చెబుతున్నారు. ఈ జంతువును స్మగ్లింగ్ చేసి, చంపడంలో చైనా ముందుంది. చైనాలో సాంప్రదాయ చైనీస్ మెడిసిన్ (TCM)లో అలుగు శరీర భాగాలను వినియోగిస్తుంటారు. అలాగే నూనెను కూడా తయారు చేస్తుంటారు. 1960 నుండి ఇప్పటివరకూ చైనాలోని అడవుల(Forests) నుండి 90% శాతానికి మించిన పాంగోలిన్‌లు హతమయ్యాయి.

మందుల తయారీ కోసం ఇప్పుడు పాంగోలిన్‌లను వియత్నాం(Vietnam), ఆఫ్రికా అరణ్యాల్లో వేటాడుతున్నారు. అంతర్జాతీయ బ్లాక్‌ మార్కెట్‌లో వీటిని భారీ మొత్తానికి విక్రయిస్తున్నారు. ఒక కిలో ఇండియన్ పాంగోలిన్ స్కిన్ ధర ఒక లక్ష రూపాయల వరకూ పలుకుతోంది. ఒక పూర్తి పాంగోలిన్‌ను(Pangolin) రూ. 10 లక్షల నుండి రూ.15 లక్షల వరకు విక్రయిస్తున్నారు.