Vijay Antony : మలేషియాలో యాక్షన్ సన్నివేశం చిత్రీకరిస్తుండగా ప్రమాదం

'బిచ్చగాడు' సినిమాతో టాలీవుడ్‌లో మంచి ఫ్యాన్ ఫాలోయింగ్ సంపాదించుకున్న హీరో విజయ్ ఆంటోని. తాజాగా విజయ్ ఓ షూటింగ్‌లో తీవ్రంగా గాయపడ్డాడు. ప్రస్తుతం మలేషియాలో ‘బిచ్చగాడు’ సీక్వెల్‌కు సంబంధించిన షూటింగ్ జరుగుతోంది. దీనిలో భాగంగా సోమవారం చిత్ర యూనిట్ బోటులో ఓ యాక్షన్ సన్నివేశాన్ని చిత్రీకరిస్తున్నారు. ఈ క్రమంలోనే బోటు అదుపుతప్పి నేరుగా కెమెరా ఉన్న బోటులోకి దూసుకెళ్లింది. ఈ ఘటనలో విజయ్ ఆంటోనీ తీవ్రంగా గాయపడ్డాడు. చిత్ర యూనిట్ ఆయనను హుటాహుటిన కౌలాలంపూర్‌లోని ఆసుపత్రికి తరలించారు. ప్రస్తుతం చికిత్స జరుగుతోంది. అయితే విజయ్‌కు ప్రాణాపాయం ఏమీ లేదని తెలుస్తోంది.

2016లో తమిళంలో ‘పిచ్చైక్కరన్’ టైటిల్‌తో విడుదలైన మూవీని తెలుగులో ‘బిచ్చగాడు’ టైటిల్‌తో రిలీజ్ చేశారు. రెండు చోట్ల ఈ చిత్రం ఘన విజయం సాధించింది. ఈ సినిమాతో టాలీవుడ్‌లోనూ విజయ్ ఆంటోనీకి ఫ్యాన్ ఫాలోయింగ్ పెరిగింది. ఇక ‘బిచ్చగాడు 2’కు ప్రస్తుతం విజయ్ ఆంటోనీయే దర్శకత్వం వహిస్తున్నాడు. అంతే కాకుండా తన సొంత బ్యానర్ విజయ్ ఆంటోనీ ఫిల్మ్ కార్పోరేషన్‌పై ఈ చిత్రాన్ని తనే స్వయంగా నిర్మిస్తున్నాడు.