IPL: హాట్‌ కేకుల్లా అమ్ముడైన ఐపీఎల్‌ టిక్కెట్లు

చెన్నై, (ఆంధ్రజ్యోతి): స్థానిక చేపాక్‌ స్టేడియంలో ఈ నెల 21న చెన్నై సూపర్‌కింగ్స్‌, హైదరాబాద్‌(Chennai Super Kings, Hyderabad) జట్ల నడుమ జరుగనున్న ఐపీఎల్‌ క్రికెట్‌ మ్యాచ్‌ టిక్కెట్లు మంగళవారం ఉదయం హాట్‌కేకుల్లా అమ్ముడయ్యాయి. ఈ టిక్కెట్లను కొనుగోలు చేయడానికి క్రీడాభిమానులు వేకువజాము నుంచే స్టేడియం వద్ద నున్న కౌంటర్ల వద్ద బారులు తీరారు. వేలాదిమంది అభిమానులను కట్టడి చేయడానికి నగర పోలీసులు తంటాలు పడ్డారు. సోమవారం అర్ధరాత్రి కౌంటర్ల వద్ద బారులు తీరేందుకు గుమికూడిన అభిమానులను పోలీసుల తరిమకొట్టారు. ఆ తర్వాత మంగళవారం ఉదయం 9.30 గంటలకు కౌంటర్లలో ఒకరికి రెండు టికెట్ల చొప్పున విక్రయించారు. సీ, డీ, ఈ గ్యాలరీలకు సంబంధించిన రూ.1500టిక్కెట్లు మాత్రమే కౌంటర్లల విక్రయించారు.రూ.2000, రూ.2500టికెట్లు ఆన్‌లైన్‌లో విక్రయించారు. రూ.3000, రూ.5000 టిక్కెట్లు కూడా ఆన్‌లైన్‌లో ప్రారంభమైన కొద్ది సేపటికే అమ్ముడయ్యాయి. ఇక కౌంటర్లలో టిక్కెట్ల అమ్మకాలు అరగంటలోపే ముగిశాయి. టిక్కెట్లు దక్కించుకున్న పలువురు క్రీడాభిమానులు వాటిని చేతపట్టుకుని అందరికీ చూపిస్తూ ఆనందంగా ఈలలు వేసుకుంటూ వెళ్ళారు.

ఇదికూడా చదవండి: ప్రభుత్వంతో సంప్రదించకుండా కొత్త కోర్సులకు అనుమతి వద్దు