IND vs SL: నరాలు తెగే మ్యాచ్‌లో లంకపై టీమిండియా థ్రిల్లింగ్ విన్..

ముంబైలోని వాంఖడే స్టేడియం వేదికగా జరిగిన టీమిండియా, శ్రీలంక తొలి టీ20 ఫైనల్ మ్యాచ్‌ను తలపించింది. ఈ ఉత్కంఠభరిత మ్యాచ్‌లో టీమిండియా రెండు పరుగుల తేడాతో లంకపై విజయం సాధించింది. శ్రీలంక ఆటగాళ్లు గెలుపు కోసం చివరి వరకూ పోరాడిన తీరు ఆద్యంతం ఆకట్టుకుంది. శ్రీలంక టాస్ గెలిచి బౌలింగ్ ఎంచుకోవడంతో తొలుత బ్యాటింగ్ చేసిన టీమిండియా నిర్ణీత 20 ఓవర్లలో 5 వికెట్ల నష్టానికి 162 పరుగులు చేసింది. 163 పరుగుల లక్ష్యంతో బరిలోకి దిగిన శ్రీలంక నిర్ణీత 20 ఓవర్లలో 160 పరుగులకు ఆలౌట్ అయింది. టీమిండియా బౌలర్లు రాణించడంతో మ్యాచ్ మన జట్టు వశమైంది.

టీ20 డెబ్యూ మ్యాచ్‌లో శివమ్ మావి అదరగొట్టాడు. 4 ఓవర్లు బౌలింగ్ చేసి 22 పరుగులు మాత్రమే ఇచ్చి 4 వికెట్లు తీశాడు. శ్రీలంకను శివమ్ మావి దెబ్బ కొట్టాడని చెప్పక తప్పదు. ఉమ్రాన్ మాలిక్ కూడా 4 ఓవర్లకు 27 పరుగులు ఇచ్చి రెండు వికెట్లు తీశాడు. హర్షల్ పటేల్ 41 పరుగులు ఇచ్చినప్పటికీ 2 వికెట్లతో ఫర్వాలేదనిపించాడు. 41 పరుగులతో రాణించిన దీపక్ హుడాకు ‘ప్లేయర్ ఆఫ్ ది మ్యాచ్’ దక్కింది.