DK Aruna: ఈ ఎన్నికల్లో పోటీకి దూరంగా డీకే అరుణ

హైదరాబాద్: తెలంగాణ అసెంబ్లీ ఎన్నికల్లో పోటీకి దూరంగా బీజేపీ జాతీయ ఉపాధ్యక్షురాలు డీకే అరుణ ( DK Aruna ) ఉంటున్నారు. ఈ మేరకు తన నిర్ణయాన్ని పార్టీ హైకమాండ్ తెలిపినట్లు సమాచారం. బుధవారం నాడు బీజేపీ పార్టీ ప్రధాన కార్యాలయంలో అరుణ మీడియాతో మాట్లాడుతూ...‘‘ తెలంగాణలో బీజేపీ పార్టీ వైపు పెరుగుతున్న ఆదరణను చూసి, కాంగ్రెస్ పార్టీని పైకి లేపేలా ప్రయత్నాలు చేస్తున్నారని వాటిని నమ్మొద్దు. బలహీన వర్గాల నుంచి బీజేపీ పార్టీ సీఎంను చేస్తుంది. తెలంగాణ ప్రజల ఆకాంక్షలు బీజేపీ పార్టీతోనే నెరవేరుతాయని ప్రజలు భావిస్తున్నారు. డబుల్ ఇంజిన్ సర్కారు ఉంటేనే రాష్ట్ర ఆర్థిక స్థితి, ప్రజల జీవన స్థితి మెరుగుపడుతుంది. కాంగ్రెస్ అడ్డగోలుగా హామీలు ఇస్తూ తెలంగాణను నట్టేట ముంచే ప్రయత్నం చేస్తోంది. కాంగ్రెస్ పాలన జనం ఆల్రెడీ చూశారు. ఒకసారి బీజేపీ పార్టీకి అవకాశం ఇవ్వాలని ప్రజలు ఆలోచిస్తున్నారు. విలువలతో కూడిన రాజకీయం బీజేపీ పార్టీ చేస్తుంది. ఇదివరకు రాజగోపాల్‌రెడ్డి బీజేపీలో చేరినప్పుడు కూడా ఎమ్మెల్యే పదవికి రాజీనామా చేసి చేరారు. అసెంబ్లీలో పోటీ చేయనని నేను గతంలోనే అధిష్ఠానానికి చెప్పాను. బీసీ సీఎం నినాదం నేపథ్యంలో నా గద్వాల స్థానం నుంచి బీసీ అభ్యర్థిని నిలబెడుతున్నాం’’ అని డీకే అరుణ తెలిపారు.