రాజగోపుర ఆవరణలో గోశాల ఏర్పాటుకు నిర్ణయం

పట్నాల టికెట్ల ధరల పెంపునకు ఆమోదం

ధర్మకర్తల మండలి సమీక్షా సమావేశంలో పలు అంశాలపై తీర్మానాలు

చేర్యాల, జనవరి 11: ఇతర ప్రముఖ ఆలయాల మాదిరిగా కొమురవెల్లి మల్లన్న ఆలయ రాజగోపుర ఆవరణలో గోకులం ఏర్పాటుకు ధర్మకర్తల మండలి నిర్ణయించింది. గతంలో దాత సహాయంతో తోటబావి ప్రాంగణానికి వెళ్లేదారిలో ఏర్పాటుచేసిన గోకులం ఆలయవర్గాల నిర్లక్ష్యంతో నిరుపయోగంగా మారిన విషయమై ఇటీవల ఆంధ్రజ్యోతిలో ‘గోమాత సేవలకు నోచుకోని మల్లన్న భక్తులు’ శీర్షికన ప్రత్యేక కథనం ప్రచురితమైన విషయం తెలిసిందే. బుధవారం మల్లన్న ఆలయంలో పాలకమండలి చైర్మన్‌ గీస భిక్షపతి ఆధ్వర్యంలో సమీక్షా సమావేశం జరిగింది. ఈ మేరకు ఆలయాభివృద్ధి, ఇతరత్రా అంశాలపై చర్చించగా, రాజగోపుర ఆవరణలో నూతనంగా గోశాల ఏర్పాటుకు నిర్ణయించారు. విధుల పట్ల నిర్లక్ష్యం వహించిన జూనియర్‌ అసిస్టెంట్‌ సందీ్‌పపై సర్వీస్‌ రూల్స్‌ ప్రకారం క్రమశిక్షణాచర్యలు తీసుకోవాలని, ఖాళీగా ఉన్న డోలు, శృతి పోస్టుల నియామకం, మల్లన్న మూలవిరాట్టుకు బంగారు రుద్రాక్షమాల, కోరమీసం, లింగం కాయ, అమ్మవార్లకు బంగారు కిరీటం తయారీ, దాసారంగుట్ట పక్కనగల సర్వే నెం.308/ఏలోని 22 ఎకరాల భూమిని భూసేకరణ ద్వారా ఖరీదు చేయుటకు, వాకీటాకీలు ఖరీదుతో పాటు పట్నాల టికెట్ల ధరల పెంపు, కోతుల బెడద నివారణకు జాలీల బిగింపు పనులకు తీర్మానం చేశారు. అనంతరం భిక్షపతి మాట్లాడుతూ ఆదాయం ఏయేటి కాయేడు రికార్డుస్థాయిలో పెరుగుతుందని, తదనుగుణంగా ఆలయాభివృద్ధికి, భక్తులకు మెరుగైన వసతుల కల్పనకు చర్యలు తీసుకుంటున్నామన్నారు. ఈ సమావేశంలో ఈవో బాలాజీశర్మ, ధర్మకర్తలు రఘు, సిద్ధిరాములు, సిద్ధిలింగం, స్వప్న, బుచ్చి రెడ్డి, గిరిధర్‌, ప్రధానార్యకుడు మల్లికార్జున్‌ పాల్గొన్నారు.