Small traders చిరువ్యాపారులు ఆర్థికంగా ఎదగాలి: జేసీపీఆర్‌

తాడిపత్రి, నవంబరు 8(ఆంధ్రజ్యోతి): పట్టణంలోని చిరువ్యాపారులు ఆర్థికంగా ఎదగాలని మున్సిపల్‌ చైర్మన జేసీ ప్రభాకర్‌రెడ్డి ఆకాంక్షించారు. స్థానిక మున్సిపల్‌ కార్యాలయ ఆవరణలో శుక్రవారం ఆయన చిరువ్యాపారులతో సమావేశమై మాట్లాడారు.

ప్రతిఒక్కరూ పరిసరాలను పరిశుభ్రంగా ఉంచుకోవాలన్నారు. ఆహారపదార్థాల తయారీ కూడా పరిశుభ్ర వాతావరణంలోనే జరగాలన్నారు. అలాంటి ప్రదేశం ఉన్నచోటనే ప్రజలు కూడా ఎంచుకుంటారని, అప్పుడు వ్యాపారం కూడా బాగా జరుగుతుందని చెప్పారు. చిరువ్యాపారులు కష్టపడి ఎదగాలన్నదే మా ధ్యేయమన్నారు. వ్యసనాలకు బానిస కాకుండా, తప్పుడు మార్గాలు ఎంచుకోకుండా వ్యాపారాలను వృద్ధి చేసుకోవాలని సూచించారు. చిరువ్యాపారులు ఆర్థికంగా ఇబ్బందులు ఉన్నట్లయితే బ్యాంకర్లతో మాట్లాడి రుణాలు ఇప్పించేందుకు తాను సిద్ధంగా ఉన్నానని తెలిపారు. సమావేశంలో కౌన్సిలర్లు పాల్గొన్నారు.

మరిన్ని అనంతపురం వార్తల కోసం..