శ్రీవారి దర్శనంతో అద్భుతమైన అనుభూతి

ప్రముఖ నటి హేమమాలిని

తిరుమల, నవంబరు2(ఆంధ్రజ్యోతి): సీనియర్‌ నటి, బీజేపీ ఎంపీ హేమమాలిని తన కుమార్తె ఈషాతో కలసి శనివారం తిరుమల వేంకటేశ్వరస్వామిని దర్శించుకున్నారు. ఉదయం వీఐపీ బ్రేక్‌ సమయంలో ఒంగోలు ఎంపీ మాగుంట శ్రీనివాసులురెడ్డితో కలిసి వారు ఆలయంలోకి వెళ్లారు. ముందుగా ధ్వజస్తంభానికి మొక్కుకుని తర్వాత గర్భాలయంలోని మూలవిరాట్టును దర్శించుకున్నారు. అనంతరం హేమమాలిని ఆలయం ముందు మీడియాతో మాట్లాడుతూ.. తిరుమలకు రావడం అదృష్టంగా భావిస్తున్నట్టు తెలిపారు.తిరుమలలో పరిశుభ్రత, ప్రకృతి అందాలు అద్భుతంగా ఉంటాయన్నారు. తాను చాలా సార్లు శ్రీవారిని దర్శించుకున్నానని, ఈసారి మరింత అద్భుతమైన అనుభూతి కలిగిందన్నారు.ఈషా దేవోల్‌ మాట్లాడుతూ.. చిన్నప్పటి నుంచి తాను చాలా సార్లు తిరుమలకు వచ్చి స్వామిని దర్శించుకున్నట్టు తెలిపారు. ఈసారి తన తల్లితో దర్శించుకోవడం చాలా ఆనందంగా ఉందన్నారు.