అభివృద్ధి దారిలో..

కంకిపాడులో డిప్యూటీ సీఎం పవన్‌ తీరుపై హర్షం

అక్టోబరు 14న పల్లె పండుగకు హాజరు

కంకిపాడు-రొయ్యూరు రహదారి పనులకు ఆదేశాలు

అక్కడితో వదిలేయకుండా ఎప్పటికప్పుడు ఆరా

రెండు నెలల్లో మళ్లీ అభివృద్ధి పనుల పరిశీలన

తాజాగా సంక్రాంతికి పూర్తికావాలని ఆదేశాలు

కంకిపాడు, డిసెంబరు 23 (ఆంధ్రజ్యోతి) : కంకిపాడు-రొయ్యూరు వయా గొడవర్రు రహదారి అభివృద్ధి పనులను సంక్రాంతి నాటికి పూర్తి చేయాలని ఉపముఖ్యమంత్రి, పంచాయతీరాజ్‌, గ్రామీణాభివృద్ధి శాఖ మంత్రి పవన్‌ కల్యాణ్‌ అధికారులను ఆదేశించారు. కంకిపాడు మండలంలోని గొడవర్రు గ్రామంలో రూ.3.75 కోట్లతో జరుగుతున్న రహదారి అభివృద్ధి పనులను, పెనమలూరు మండలం గోసాల గ్రామ పరిధిలో రూ.33 లక్షలతో చేపట్టిన రహదారి, డ్రెయినేజీ అభివృద్ధి పనులను సోమవారం ఆయన పరిశీలించారు. మంగళగిరి నుంచి రోడ్డు మార్గాన గొడవర్రుకు చేరుకున్న ఆయన రహదారి నాణ్యతను పరిశీలించారు. రహదారి ఎప్పటికి పూర్తవుతుందో అధికారులను అడిగి తెలుసుకున్నారు. అనంతరం గోసాల గ్రామ పరిధిలో రూ.33 లక్షలతో చేపట్టిన రహదారి, డ్రెయినేజీ పనులను పరిశీలించారు. పంచాయతీరాజ్‌ శాఖ అధికారులకు పలు సూచనలు చేశారు. ఈ కార్యక్రమంలో ఎక్సైజ్‌ శాఖ మంత్రి కొల్లు రవీంద్ర, ఎమ్మెల్యే బోడె ప్రసాద్‌, జనసేన పార్టీ నియోజకవర్గ అధ్యక్షుడు ముప్పా రాజా, టీడీపీ గ్రామ అధ్యక్షుడు సుబానీ, స్థానిక టీడీపీ, జనసేన పార్టీ నాయకులు పులి శ్రీనివాసరావు, ఎందువ రాంబాబు, ఏనుగ జయప్రకాష్‌, వంగూరు పవన్‌ పాల్గొన్నారు. గొడవర్రు గ్రామంలో జరిగిన పవన్‌ పర్యటనలో కేటుగాళ్లు చేతివాటం చూపించారు. కంకిపాడుకు చెందిన తిరుపతిరావు అనే వ్యక్తి పవన్‌ను కలిసేందుకు రాగా, ఆయన జేబులో ఉన్న సుమారు రూ.18 వేలు దొంగతనానికి గురయ్యాయి. అలాగే, ఓ రిపోర్టర్‌ జేబులోని సుమారు రూ.3 వేలతో పాటు మరో రిపోర్టర్‌ మనీపర్సు కూడా మాయమైంది.