వీఎంఆర్‌డీఏ కొత్త లేఅవుట్లు

విశాఖ, అనకాపల్లి జిల్లాల్లో ఏర్పాట్లు

నాలుగు ప్రాంతాల్లో 46 ఎకరాల్లో 538 ప్లాట్లు

ఏడాదిలోగా ప్లాట్లను వేలానికి సిద్ధం చేయాలని నిర్ణయం

(విశాఖపట్నం-ఆంధ్రజ్యోతి)

విశాఖపట్నం మెట్రోపాలిటన్‌ రీజియన్‌ డెవలప్‌మెంట్‌ అథారిటీ (వీఎంఆర్‌డీఏ) కొత్త లేఅవుట్ల ఏర్పాటుపై దృష్టిసారించింది. వైసీపీ ప్రభుత్వంలో ఎంఐజీ టౌన్‌షిప్‌లు వేసినా పెద్దగా స్పందన రాలేదు. ఆనందపురం మండలం పాలవలస మినహా మిగిలినచోట్ల లేఅవుట్లలో ప్లాట్ల కొనుగోలుకు ఎవరూ ముందుకు రాలేదు. ఈ నేపథ్యంలో విశాఖపట్నం, అనకాపల్లి జిల్లాల్లో అభివృద్ధి చెందుతున్న ప్రాంతాల్లో సంస్థకు ఉన్న భూముల్లో లేఅవుట్లు వేయాలని నిర్ణయించింది. మొత్తం 46 ఎకరాల్లో 538 ప్లాట్లు వచ్చేలా ప్లానింగ్‌ విభాగం ప్రణాళికలు రూపొందించింది.

- భీమిలి మండలం కాపులుప్పాడలో 20.48 ఎకరాల్లో 209 ప్లాట్లు వేసేందుకు ప్లాన్‌ సిద్ధం చేసింది. ఆ భూమిని అభివృద్ధి చేయడానికి రూ.14.51 కోట్లు వ్యయం అవుతుందని అంచనా వేసింది. వాటిని విక్రయిస్తే రూ.86 కోట్ల ఆదాయం వస్తుందని అంచనా.

- భీమిలి మండలం నిడిగట్టులో 8.15 ఎకరాలలో 103 ప్లాట్లు వేయడానికి రూ.519 కోట్లు ఖర్చుతో ప్రణాళిక వేశారు. వీటి అమ్మకం ద్వారా రూ.23 కోట్లు వసుందని భావిస్తున్నారు.

- పెందుర్తి మండలం చినముషిడివాడలో 4.7 ఎకరాలలో 84 ప్లాట్లు వేయడానికి రూ.3.1 కోట్లు ఖర్చు అవుతుందని, వాటి విక్రయం ద్వారా రూ.40 కోట్లు వస్తుందని అంచనా వేశారు.

- అనకాపల్లి మండలం తుమ్మపాలలో 12.68 ఎకరాలలో 142 ప్లాట్లు వేయడానికి రూ.5 కోట్లు ఖర్చు అవుతుందని, వాటి విక్రయం ద్వారా రూ.35 కోట్లు వస్తుందని అంచనా.

ఈ ప్రాజెక్టులను ఏడాది సమయంలోగా అభివృద్ధి చేసి ప్లాట్లను వేలానికి సిద్ధం చేయాలని అధికారులు ఆలోచిస్తున్నారు. లేఅవుట్ల అభివృద్ధిలో భాగంగా బీటీ రహదారులు, విద్యుద్దీకరణ, పార్కుల నిర్మాణం, 60 అడుగుల రహదారులకు డివైడర్లు, సీసీ కాలువలు, కల్వర్టులు, ఎవెన్యూ ప్లాంటేషన్‌ చేయనున్నారు. ఈ ప్రతిపాదలన్నీ పురపాలక శాఖ ఆమోదం కోసం అమరావతి పంపించారు. ఆమోదం లభిస్తే టెండర్లు పిలిచి లేఅవుట్లు అభివృద్ధి చేస్తారు. ఆ తరువాత ప్లాట్లను వేలం ద్వారా విక్రయిస్తారు.