ఉరితాడు తగిలించుకుని..

పార్వతీపురం/బెలగాం, నవంబరు 23 (ఆంధ్రజ్యోతి) : గిరిజన సంక్షేమ, గురుకుల పాఠశాలల్లో పని చేస్తున్న అవుట్‌ సోర్సింగ్‌ ఉపాధ్యాయులు మెడకు ఉరితాడు తగిలించుకుని వినూత్నంగా నిరసన తెలిపారు. తమ సమస్యలు పరిష్కరించాలని ఐటీడీఏ ఎదుట వారు చేపట్టిన దీక్ష నాలుగో రోజుకు చేరింది. శనివారం వారు మాట్లాడుతూ.. కనీస వేతనం ఇవ్వాలని, ఉద్యోగ భద్రత కల్పించాలని, సీఆర్టీలుగా గుర్తించాలని డిమాండ్‌ చేశారు. డీఎస్సీ నుంచి తాము పని చేస్తున్న పోస్టులను మినహాయించాలని కోరారు. తమ సమస్యలు పరిష్కరించే వరకు పోరాటం చేస్తామని స్పష్టం చేశారు. వీరి ఆందోళనకు సీపీఎం, గిరిజన సంక్షేమ సంఘం నాయకులు ఎం.కృష్ణమూర్తి , రంజిత్‌కుమార్‌, ఏపీటీఎఫ్‌ జిల్లా ప్రధాన కార్యదర్శి బాలకృష్ణారావు, ఎస్‌ఎఫ్‌ఐ జిల్లా అధ్యక్షుడు రాజు మద్దతు తెలిపారు.