Viral News: ప్రపంచంలోనే అత్యంత పరిశుభ్రమైన దేశం ఇదే.. సోషల్ మీడియా ఇన్‌ఫ్లుయెన్సర్ సెన్షేషనల్ కామెంట్స్..

Simran Balar Jain: సోషల్‌ మీడియాలో మనకు స్వేచ్ఛ ఎక్కువ. ఏదైనా సరే మనకు అనిపించింది వెంటనే షేర్ చేస్తాం. కొన్ని వీడియోస్ మనకు సంతోషాన్ని ఇస్తే.. మరికొన్ని ఆశ్చర్యానికి గురి చేస్తాయి. అయితే, కంటెంట్‌ బాగుంటే మాత్రం అది వైరల్ గా మారుతుంది. ప్రస్తుతం ఇంటర్నెట్‌లో దూసుకుపోతున్న అలాంటి వీడియో ఒకటి నెటిజన్స్‌ను సర్ ప్రైజ్ చేస్తుంది. రద్దీగా ఉండే, పట్టణ ప్రాంతంలో నడవడం ద్వారా మనం ఆశించే దానికి పూర్తి విరుద్ధంగా ఆ వీడియో ఉంది. ఆ వీడియోను 2.6 కోట్ల మంది వీక్షణించారు.

ఆ వైరల్ వీడియోలో ఏముందంటే..

ఇండియన్ సోషల్ మీడియా ఇన్‌ఫ్లుయెన్సర్ సిమ్రాన్ బలార్ జైన్ అనే మహిళ జపాన్‌ వీధుల్లో సరదాగా కాసేపు తిరుగుతూ కనిపించింది. అక్కడే సమీపంలోని దుకాణం నుండి తెల్లటి సాక్స్‌లను కొనుగోలు చేసింది. తన బూట్లను చేతితో పట్టుకుని కేవలం తెల్లటి సాక్స్‌లను ధరించి కొంత దూరం నడిచింది. తర్వాత ఆమె తన సాక్స్‌లను చూసి ఒక్కసారిగా షాక్ అయింది. ఎందుకంటే తన సాక్స్ లకు ఏ మాత్రం ధూళి, మరకలు అంటలేదు.

ఇదే నిదర్శనం..

రద్దీగా ఉండే వీధుల్లో తిరిగినప్పటికీ, ఆమె సాక్స్‌లు కొన్నప్పుడు ఎలా ఉన్నాయో.. వేసుకున్న తర్వాత కొంత దూరం షూస్ లేకుండా నడిచినప్పుడు కూడా ఎలాంటి మరకులు లేకుండా అలానే ఉన్నాయి. సాధారణంగా ఎక్కడైనా కూడా రద్దీగా ఉండే ప్రాంతాల్లో దుమ్ము, ధూళి, మరకలు ఎక్కువగా అంటుతాయి. అలాంటిది తాను కేవలం సాక్స్ లతో నడిచిన ఏ మాత్రం మరక అంటకపోవడంతో తాను ఒక్కసారిగా ఆశ్చర్యానికి గురైంది. వెంటనే ఈ సంఘటనను సోషల్ మీడియాలో షేర్ చేసింది. ప్రపంచంలోనే అత్యంత పరిశుభ్రమైన దేశం ఇదేనంటూ పోస్ట్ చేసింది. జపాన్ వీధులు ఎంతో శుభ్రంగా ఉన్నాయంటూ అందుకు ఇదే నిదర్శనమంటూ వీడియో పోస్ట్ చేసింది. ఆ వీడియో ఇప్పుడు నెట్టింట్లో వైరల్ అవుతోంది.