Pune : లైక్‌లు, కామెంట్ల కోసం దుస్సాహసం!
ABN , Publish Date - Jun 21 , 2024 | 04:39 AM
ఇన్‌స్టాలో లైకులు, కామెంట్లు వెల్లువలా వచ్చి పాపులర్‌ అవుతామనే ఉద్దేశంతో పుణెలో ఆ ఇద్దరు మైనర్లు చేసిన సాహసం, నెటిజన్లను గగుర్పాటుకు గురిచేసింది.
అబ్బాయి చెయ్యే ఆధారంగా కోట అంచున
గాల్లో ప్రమాదకరస్థితిలో వేలాడిన అమ్మాయి
పుణె, జూన్‌ 20: ఇన్‌స్టాలో లైకులు, కామెంట్లు వెల్లువలా వచ్చి పాపులర్‌ అవుతామనే ఉద్దేశంతో పుణెలో ఆ ఇద్దరు మైనర్లు చేసిన సాహసం, నెటిజన్లను గగుర్పాటుకు గురిచేసింది. లైకులు, కామెంట్ల మాటేమో గానీ చాలామంది ‘ఆ ఇద్దరినీ పోలీసులు వెంటనే అరెస్టు చేయాలి’ అంటూ కన్నెర్ర చేశారు! ఆ రీల్‌ చూస్తే.. ‘ఏమిటీ మూర్ఖపు పని’ అంటూ మీరూ నోరెళ్లబెడతారు. ఆ దుస్సాహం వర్ణించడానికి మాటలు రావు. ఏడెనిమిది అంతస్తులంత ఎత్తయిన కోట అంచున ఓ అబ్బాయి బోర్లా పడుకున్నాడు! అతడి చేతిని పట్టుకొని ఓ అమ్మాయి అత్యంత ప్రమాదకర స్థాయిలో కిందకు వేలాడుతోంది!
అబ్బాయి చేయి జారవిడిచినా.. తాను పట్టు కోల్పోయినా పరిస్థితేమిటి? అనే స్పృహ కూడా లేకుండా అంత ప్రమాదకర స్థితిలోనూ ఆ పిల్ల నవ్వులు చిందించడం గమనార్హం. ఈ దృశ్యాన్ని పక్క నుంచి మరో అబ్బాయి వీడియో తీశాడు. ఇప్పుడీ వీడియో ఇన్‌స్టాగ్రామ్‌, ఎక్స్‌లో వైరల్‌గా మారింది. ‘దయచేసి ఈ వీడియో చూడండి.. ఎంత ప్రమాదకర స్థాయిలో తీశారో? కాలం కాటేసేందుకు పొంచివుంది’ అంటూ ఓ నెటిజెన్‌ ఆందోళన వ్యక్తం చేశారు. ‘ఈ ఇద్దర్నీ జైల్లో పెట్టాలి. అప్పుడే ఇలాంటి వీడియోలు ఇంకెవరూ చేసేందుకు సాహసించరు’ అంటూ మరో నెటిజన్‌ ఆగ్రహం వ్యక్తం చేశారు.
