రూ.200 కోట్లు దానం చేసి.. ఆధ్యాత్మిక మార్గంలోకి

22న గుజరాత్‌ దంపతుల జైన సన్యాసం

రూ.200 కోట్ల సంపదను దానం చేసి..

సూరత్‌, ఏప్రిల్‌ 15: గుజరాత్‌లోని ఓ సంపన్న కుటుంబానికి చెందిన దంపతులు ఆధ్యాత్మిక మార్గంలోకి వెళ్లాలని నిర్ణయించుకుని, దాదాపు రూ.200 కోట్ల తమ సంపదను దానం చేశారు. హిమ్మత్‌నగర్‌కు చెందిన వ్యాపారవేత్త భవేశ్‌ భండారి దంపతులకు ఓ కూతురు(19), ఓ కుమారుడు(16) ఉండగా.. 2022లోనే వారు జైన సన్యాసం తీసుకున్నారు. బంధాలను, సకల సౌకర్యాలను త్యజించి సన్యాసులుగా జీవిస్తున్నారు. వారి నుంచి ప్రేరణ పొందిన తల్లిదండ్రులు కూడా అదే మార్గంలోకి వెళ్లాలని నిర్ణయించుకున్నారు. గత ఫిబ్రవరిలో నిర్వహించిన ఓ కార్యక్రమంలో తమ సంపదను మొత్తం దానం చేశారు. ఈ నెల 22న భండారి దంపతులు జైన సన్యాసం స్వీకరించనున్నారు. అప్పటి నుంచి వారు కేవలం రెండు తెల్లటి వస్త్రాలు, ఓ రజోహరన్‌(చీపురులాంటిది), భిక్షం ఎత్తుకునేందుకు ఓ పాత్రను మాత్రమే కలిగి ఉంటారు. కాళ్లకు చెప్పులు కూడా లేకుండా దేశ పర్యటన చేస్తూ, భిక్షను స్వీకరిస్తూ జీవిస్తారు.