Supreme Court: మెడికల్‌ కోర్సుల మిగిలిన సీట్లకు ప్రత్యేక కౌన్సెలింగ్‌ నిర్వహించండి
ABN , Publish Date - Dec 23 , 2024 | 03:18 AM
వైద్య కళాశాలల్లో ప్రవేశాలకు సంబంధించి సుప్రీంకోర్టు కీలక ఆదేశాలు ఇచ్చింది. నీట్‌ అయిదో విడిత కౌన్సెలింగ్‌ తరువాత కూడా అండర్‌ గ్రాడ్యుయేట్‌ కోర్సుల్లో సీట్లు మిగిలితే వాటి భర్తీకి ప్రత్యేక కౌన్సెలింగ్‌ నిర్వహించాలని ఆదేశించింది.
విలువైన సీట్లు వృథా కాకూడదు.. ఎంసీసీకి సుప్రీం ఆదేశాలు
న్యూఢిల్లీ, డిసెంబరు 22: వైద్య కళాశాలల్లో ప్రవేశాలకు సంబంధించి సుప్రీంకోర్టు కీలక ఆదేశాలు ఇచ్చింది. నీట్‌ అయిదో విడిత కౌన్సెలింగ్‌ తరువాత కూడా అండర్‌ గ్రాడ్యుయేట్‌ కోర్సుల్లో సీట్లు మిగిలితే వాటి భర్తీకి ప్రత్యేక కౌన్సెలింగ్‌ నిర్వహించాలని ఆదేశించింది. ఈ నెల 30న అయిదో విడత కౌన్సెలింగ్‌ ముగియనుండడం గమనార్హం. ఈ ఒక్కసారికి ప్రత్యేక సందర్భంగా పరిగణించి ఈ ఆదేశాలు ఇస్తున్నట్టు పేర్కొంది. ఈ మేరకు జస్టిస్‌ బి.ఆర్‌.గవాయ్‌, జస్టిస్‌ కె.వి.విశ్వనాథన్‌ల ధర్మాసనం మెడికల్‌ కౌన్సెలింగ్‌ కమిటీ (ఎంసీసీ)కి ఆదేశాలు ఇచ్చింది. మిగిలిన సీట్లకు కూడా విడి/ప్రత్యేక (స్ట్రే/స్పెషల్‌) కౌన్సెలింగ్‌ నిర్వహించాలంటూ దాఖలైన పిటిషన్లపై జరిపిన ధర్మాసనం ఈ నిర్ణయాన్ని వెలువరించింది. కేవలం వెయింటింగ్‌ లిస్టులో ఉన్న అభ్యర్థులనే కౌన్సెలింగ్‌ చేసి సీట్లు కేటాయించాలని పేర్కొంది.
