Tamilnadu: తమిళనాడులో ఉచిత బస్సు ప్రయాణం.. స్టడీలో తేలిన ఆసక్తికర విషయాలు

ఈమధ్య కాలంలో రాష్ట్ర ప్రభుత్వాలు మహిళల కోసం ప్రత్యేకంగా ఉచిత బస్సు ప్రయాణ పథకాలను (Fare-Free Bus Scheme) ప్రవేశపెడుతున్న విషయం అందరూ చూస్తూనే ఉన్నారు. కాంగ్రెస్ (Congress) ఎన్నికల అస్త్రాల్లో ఈ పథకం కీలక పాత్ర పోషించింది. అటు కర్ణాటకలో (Karnataka), ఇటు తెలంగాణలో (Telangana) కాంగ్రెస్ పార్టీ అధికారంలోకి రావడానికి ఈ పథకం దోహదపడిందని చెప్పుకోవచ్చు. అయితే.. కర్ణాటక, తెలంగాణ రాష్ట్రాల కన్నా ముందే తమిళనాడులో (Tamil Nadu) ఈ స్కీమ్‌ని తీసుకొచ్చారు. ఆ రాష్ట్ర ప్రభుత్వం ఈ పథకాన్ని ప్రారంభించి దాదాపు మూడు సంవత్సరాలు కావొస్తోంది.

ఈ నేపథ్యంలోనే.. చెన్నైకి చెందిన సిటిజన్ కన్స్యూమర్ అండ్ సివిక్ యాక్షన్ గ్రూప్ (CAG) ఈ పథకం ప్రభావాన్ని అర్థం చేసుకునేందుకు ‘టువర్డ్స్ జెండర్ ఇన్‌క్లూసివ్ ట్రాన్స్‌పోర్ట్’ పేరుతో ఒక అధ్యయనం నిర్వహించింది. ఈ స్టడీలో భాగంగా.. తమిళనాడులోని చెన్నై (Chennai), కోయంబత్తూర్, సేలం, తిరునెల్వేలి, తిరువణ్ణామలై, తిరువారూరు వంటి నగరాల్లో మొత్తం 3వేల మంది మహిళల్ని CAG ఇంటర్వ్యూ చేసింది. ఈ స్కీమ్‌ను ప్రవేశపెట్టినప్పటి నుండి ఈ ఆరు నగరాల్లో.. బస్సుల్లో ప్రయాణించే మహిళల సంఖ్య గణనీయంగా పెరిగిందని ఈ అధ్యయనం పేర్కొంది. ఫలితంగా.. ఇతర రవాణా మార్గాలైన పారాట్రాన్సిట్, ప్రైవేట్ వాహనాల వినియోగం తగ్గిందని తెలిపింది.

ఈ పథకం వల్ల.. సగటున మహిళలు నెలకు సుమారు రూ.800 ఆదా చేస్తున్నారని CAG అధ్యయనం వెల్లడించింది. ఇలా ఆదా అవుతున్న డబ్బులు.. కుటుంబ అవసరాలు, విద్య, ఆరోగ్య సంరక్షణకు వెళ్తోందని.. ఇది కుటుంబంతో పాటు సమాజానికి మెరుగైన ఫలితాలను అందిస్తోందని పేర్కొంది. ఈ అధ్యయాన్ని MTC మేనేజింగ్ డైరెక్టర్ డాక్టర్ ఆల్బీ జాన్ వర్గీస్ స్వాగతిస్తూ.. ఈ పథకం మహిళలకు ఎంతో ఉపయోగపడుతోందని, ఎందుకంటే వారిలో చాలా మందికి వ్యక్తిగత వాహనాలు లేవని తెలిపారు. మరిన్ని బస్సుల ఆవశ్యకతను తాము గుర్తించామని.. ప్రస్తుతం చెన్నై, రాష్ట్రంలోని ఇతర నగరాలకు వాటిని సేకరించేందుకు ప్రభుత్వం కృషి చేస్తోందని తెలిపారు.