Watch Video: వామ్మో.. గేదెకు కోపం వస్తే ఇలా ఉంటుందా? రోడ్డు మీద జనాలను ఎలా పరుగులు పెట్టించిందో చూడండి..

సాధారణంగా ఆవులు, గేదెలు ఎవరి జోలికీ వెళ్లవు. వాటి యజమాని లేకపోయినా రోడ్డు మీద ఓ పక్కగా నడుచుకుంటూ వెళ్లిపోతాయి. మనుషుల పైన దాడి చేసే స్వభావం వాటికి ఉండదు. అయితే వాటికి తిక్క రేగితే మాత్రం ఎంతటి వారైనా హడలిపోవాల్సిందే. తాజాగా కేరళకు (Kerala) చెందిన ఓ వ్యక్తికి ఇలాంటి అనుభవమే ఎదురైంది. ఆ వ్యక్తి రోజూ లాగానే ఇంటి నుంచి స్కూటీపై బయల్దేరాడు. అయితే దురదృష్టవశాత్తూ భయంకర అనుభవం ఎదుర్కొన్నాడు.

కేరళలోని కోచిలో ఈ ఘటన జరిగింది. కోచి (Kochi)లోని ఎయిర్‌పోర్ట్ రోడ్డు మధ్యలో ఓ గేదె (Buffalo) నిల్చుని ఉంది. స్కూటీ మీద ఓ వ్యక్తి ఆ గేదె ముందు నుంచి వెళ్తున్నాడు. తీవ్ర ఆగ్రహంగా ఉన్న ఆ గేదె ఆ వ్యక్తిని ఢీకొని స్కూటీ మీద నుంచి కింద పడేసింది. అయినా వదలకుండా కింద పడిన వ్యక్తిని కొమ్ములతో కుమ్మేసింది. అతడిని కాపాడడానికి కొందరు ప్రయత్నించారు. వారి వైపు కోపంగా పరిగెత్తుకుంటూ వెళ్లింది. wander_diaries అనే ఇన్‌స్టాగ్రామ్ హ్యాండిల్‌లో ఈ వీడియో షేర్ అయింది.

ఈ వీడియో సోషల్ మీడియాలో వైరల్‌గా మారింది. కోట్లలో వ్యూస్ దక్కించుకుంది. 4.3 లక్షల మందికి పైగా ఈ వీడియోను లైక్ చేశారు. ఈ వీడియోపై నెటిజన్లు కామెంట్లు వర్షం కురిపించారు. ``ఆ గేదెకు ఎందుకంత కోపం వచ్చింది``, ``ఆ గేదెకు పింక్ కలర్ నచ్చలేదేమో``, ``అన్ని వాహనాల మధ్యలో ఆ గేదె భయపడింది``, ``ఆ తర్వాత ఏం జరిగింది? ఆ మనిషికి ఏమైంది`` అంటూ నెటిజన్లు కామెంట్లు చేశారు.