Hydearbad: మద్యం లోడుతో వెళ్తున్న డీసీఎం బోల్తా

• మద్యం బాటిళ్ల కోసం ఎగబడిన మందుబాబులు

బోయినపల్లి, మే22(ఆంధ్రజ్యోతి): మద్యం లోడ్‌తో వెళుతున్న ఓ డీసీఎం టైరు పగలడంతో అదుపుతప్పి మేడ్చల్‌ జాతీయ రహదారిపై బోల్తా పడింది. ఉషారాణి పేరుతో ఉన్న శ్రీవైన్స్‌, బంజారాహిల్స్‌ రోడ్డునెంబర్‌-3, రోడ్డునెంబర్‌-10, పంజాగుట్టలోని వైన్స్‌ దుకాణాలకు ఐఎంఎల్‌ఎఫ్‌ లిక్కర్‌ డిపో కొంపల్లి నుండి ఓ డీసీఎం వాహనంలో రూ.30 లక్షల నుంచి రూ.40 లక్షల విలువ చేసే మద్యం లోడు బయలుదేరింది. ఆ వాహనం బోయినపల్లిలోని ఎంఎంఆర్‌ గార్డెన్‌ లిక్కర్‌ మార్ట్‌ సమీపానికి చేరాక డీసీఎం వెనుక టైర్‌ ఒక్కసారిగా పేలిపోయింది. దాంతో వాహనం అదుపుతప్పి జాతీయరహదారిపై బోల్తా పడింది. మద్యం సీసాలు చెల్లాచెదురుగా పడిపోయాయి. దాంతో మందు బాబులు ఎగబడి అందినన్ని మద్యం సీసాలు తీసుకెళ్లారు.