Kumaram Bheem Asifabad: ఆదర్శ కమ్యూనిస్టు టీఎస్‌ వెంకటరమణ

-సీపీఐ(ఎం) రాష్ట్ర కార్యదర్శి తమ్మినేని వీరభద్రం

కాగజ్‌నగర్‌, నవంబరు 9(ఆంధ్రజ్యోతి): ఆదర్శ కమ్యూనిస్టు టీఎస్‌ వెంకటరమణ అని సీపీఐ(ఎం) రాష్ట్ర కార్యదర్శి తమ్మినేని వీరభద్రం అన్నారు. శనివారం పట్టణంలోని రాయల్‌గార్డెన్స్‌లో ఆచరణవాది టీఎస్‌ వెంకరమణ పుస్తకావిష్కరణ సభ నిర్వహించారు. ప్రజాసంఘాల ఐక్యవేదిక ఆధ్వర్యంలో నిర్వహించిన సభలో ఆయన మాట్లాడారు. ఎంతోమంది తాము కమ్యూనిస్టులమని చెప్పుకుంటున్నా వారికి సిద్ధాంతంపై పూర్తిగా పట్టు ఉండదన్నారు. కానీ వెంకటరమణ మాత్రం కమ్యూనిస్టు సిద్ధాంతాన్ని లోతుగా అధ్యాయనం చేశారని, దానిని పది మందికి చెప్పుతూ ఎంతో మంది కమ్యూనిస్టులను తయారు చేశారని కొనియాడారు. ఆయన ఆదర్శాన్ని పుణికిపుచ్చుకోవాలని పిలుపునిచ్చారు. కార్యక్రమంలో రాష్ట్ర ప్రధానకార్యదర్శి పాడుగు భాస్కర్‌, రాష్ట్ర ఉపాధ్యక్షుడు భూపాల్‌, తెలంగాణ ఆదివాసీ గిరిజన సంఘం రాష్ట్ర ఉపాధ్యక్షుడు బండారు రవికుమార్‌ తదితరులు పాల్గొన్నారు. సీపీఐ(ఎం) రాష్ట్ర నాయకులు జిరాములు రచించిన నక్సలిజం నాకేం నేర్పింది అనే పుస్తకాన్ని తమ్మినేని వీరభద్రం ఆవిష్కరించారు.

నిత్యాన్నదాన సత్రం పరిశీలన..

కాగజ్‌నగర్‌ బస్టాండులో మాజీఎమ్మెల్యే కోనేరు కోనప్ప చేపడుతున్న నిత్యాన్నదాన సత్రాన్ని శనివారం సీపీఐ(ఎం) రాష్ట్ర కార్యదర్శి తమ్మినేని వీరభద్రం పరిశీలించారు. ఈ సందర్భంగా అన్నదానం సమకూరుస్తున్న తీరుతెన్నులపై కోనేరు చారిటబుల్‌ ట్రస్టు చైర్మన్‌ కోనేరు వంశీని వివరాలు అడిగితెలుసుకున్నారు. ఆయన వెంట స్థానిక నాయకులున్నారు.