KTR: తెలంగాణ కాలకేయుడిలా మారిన రేవంత్‌
ABN , Publish Date - Nov 21 , 2024 | 04:34 AM
తెలంగాణకు రేవంత్‌రెడ్డి కాలకేయుడిలా మారారని, బాహుబలి లాంటి కేసీఆర్‌ చేతిలో రేవంత్‌ రాజకీయ జీవితం పరిసమాప్తం కావడం ఖాయమని బీఆర్‌ఎస్‌ నేతలు పేర్కొన్నారు.
కేసీఆర్‌ మొక్క కాదు.. మహావృక్షం: బీఆర్‌ఎస్‌ నేతలు
ధర్నా అంటే ధైర్యం సరిపోవడం లేదా రేవంత్‌?: కేటీఆర్‌
హైదరాబాద్‌, నవంబరు 20 (ఆంధ్రజ్యోతి): తెలంగాణకు రేవంత్‌రెడ్డి కాలకేయుడిలా మారారని, బాహుబలి లాంటి కేసీఆర్‌ చేతిలో రేవంత్‌ రాజకీయ జీవితం పరిసమాప్తం కావడం ఖాయమని బీఆర్‌ఎస్‌ నేతలు పేర్కొన్నారు. ఈ మేరకు ఎమ్మెల్సీ పోచంపల్లి శ్రీనివా్‌సరెడ్డి బీఆర్‌ఎస్‌ నేతలు పొన్నాల లక్ష్మయ్య, జోగురామన్న తదితరులు మీడియాతో మాట్లాడారు. ప్రాణాలకు తెగించి పోరాడి తెలంగాణ తెచ్చిన కేసీఆర్‌ మొక్కకాదు.. మహావృక్షమన్న విషయాన్ని గుర్తుంచుకోవాలన్నారు.
రేవంత్‌రెడ్డి రాజకీయ ప్రస్థానం టీఆర్‌ఎ్‌సతోనే మొదలైందని, అప్పుడు కేసీఆర్‌ను పొగుడుతూ ప్రకటనలు చేసిన రేవంత్‌ ఇప్పుడు నోటికొచ్చినట్లు తిట్టడం సరికాదన్నారు. కాగా, బీఆర్‌ఎస్‌ ఆధ్వర్యంలో ధర్నా చేపడతామంటే సీఎం రేవంత్‌రెడ్డికి ధైర్యం సరిపోవడం లేదా? అని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ బుధవారం ఎక్స్‌వేదికగా ప్రశ్నించారు. మహబూబాబాద్‌లో మహాధర్నాకు ఎందుకు అనుమతి ఇవ్వడం లేదు? చిట్టినాయుడూ అంటూ కేటీఆర్‌ నిలదీశారు.
