రక్తమోడిన రహదారులు

వేర్వేరు రోడ్డు ప్రమాదాల్లో నలుగురి మృతి

పలువురికి గాయాలు

నారాయణఖేడ్‌, ఆగస్టు 25: ఆదివారం జరిగిన రోడ్డు ప్రమాదాల్లో నలుగురు మృతిచెందగా.. పలువురు గాయపడ్డారు. ఈ సంఘటన సంగారెడ్డి జిల్లా నారాయణఖేడ్‌, సిద్దిపేట జిల్లా కొండపాక, చేర్యాల మండలాల్లో చోటు చేసుకున్నది. ఎదురుగా వస్తున్న లారీని బైక్‌తో రాంగ్‌రూట్‌లో వెళ్లి ఢీకొనడంతో బైక్‌పై వెళ్తున్న ఇద్దరు మృతిచెందారు. నారాయణఖేడ్‌ ఎస్‌ఐ విద్యా చరణ్‌రెడ్డి వివరాల ప్రకారం.. కంగ్టి మండలం బీంరాకు చెందిన సునీల్‌, మహారాష్ట్రలోని దెగ్లూర్‌ తాలుక నారంగల్‌ గ్రామానికి చెందిన శ్రీనివాస్‌(27) బైక్‌పై జోగిపేట వైపు వెళ్తున్నారు. నారాయణకేడ్‌ పరిధిలోని నిజాంపేట సమీపంలో జాతీయ రహదారి 161పై హర్యానాకు చెందిన లారీ నాందేడ్‌కు వెళ్తుండగా.. రాంగ్‌రూట్‌లో వెళ్లిన వీరు ఢీకొట్టారు. దీంతో శ్రీనివాస్‌ అక్కడికక్కడే మృతిచెందాడు. తీవ్రగాయాల పాలైన సునీల్‌ను మెరుగైన వైద్యం కోసం జోగిపేట ఆస్పత్రికి తరలించగా.. అక్కడ పరిశీలించిన వైద్యులు అప్పటికే మృతిచెందాడని నిర్ధారించారు. రాంగ్‌రూట్‌లో రావడం వల్లే ఈ ప్రమాదం జరిగిందని ఎస్‌ఐ తెలిపారు.

చేర్యాల మండలంలో...

చేర్యాల, ఆగస్టు 25: చేర్యాల పట్టణ శివారు నర్సాయపల్లి దారిలో బొలెరో, బైక్‌ ఢీకొన్న సంఘటనలో ఒకరు మృతిచెందగా, మరొకరు తీవ్రగాయాలపాలయ్యారు. కర్నూలు జిల్లా దోన్‌ మండలం మల్కాపురం గ్రామానికి చెందిన బోయ హరి( 26)తో పాటు నంద్యాల జిల్లా బేతంచర్ల మండలం గూటిపల్లి గ్రామానికి చెందిన బోయన్నగారి బాలకృష్ణ తదితరులు నర్సాయపల్లి శివారులో ఓ భవన నిర్మాణం కూలీ పనులు నిర్వహిస్తున్నారు. ఆదివారం చేర్యాల పట్టణంలో సామగ్రి కొనుగోలు చేసి బైక్‌పై తిరిగి వెళ్తుండగా.. ఎదురుగా వస్తున్న బొలెరో ఢీకొన్నది. ఈ ఘటనలో హరి అక్కడికక్కడే మృతిచెందగా.. బాలకృష్ణకు తీవ్రగాయాలయ్యాయి. చుట్టుపక్కల వ్యవసాయ బావుల వద్ద ఉన్న రైతులు గమనించి పోలీసులకు సమాచారమందించారు. బాలకృష్ణను చికిత్స నిమిత్తం ప్రభుత్వ ఆస్పత్రికి తరలించారు. ఈ విషయమై పోలీసులు విచారణ చేపట్టారు. మృతదేహాన్ని మార్చురీకి తరలించారు.

కొండపాక మండలంలో..

కొండపాక, ఆగస్టు 25: కొండపాక శివారులోని ఆనంద నిలయం వృద్ధాశ్రమం సమీపంలో రాజీవ్‌ రహదారిపై ఆదివారం జరిగిన రోడ్డు ప్రమాదంలో ఒకరు మృతిచెందగా.. ఇద్దరికి తీవ్ర గాయాలయ్యాయి. హైదరాబాద్‌ నుంచి సిద్దిపేట వెళ్తున్న కారు డ్రైవర్‌ వేగంగా వెళ్లి ముందుగా ఉన్న బైక్‌ను ఢీకొట్టి సడన్‌ బ్రేక్‌ వేశాడు. కారు వెనకాలే వస్తున్న మరో ద్విచక్ర వాహనం కారుకు తగిలి ముందుకు వెళ్లి.. మరో బైక్‌కు తగిలింది. దీంతో బైక్‌పై ఉన్న కొమురవెల్లి మండలం గురువన్నపేట గ్రామానికి చెందిన అందే వీరేశం(36) తలకు బలమైన గాయాలయ్యాయి. అలాగే మరో బైక్‌పై ఉన్న దుద్దెడ గ్రామానికి చెందిన రాకేష్‌, లక్ష్మణ్‌కు గాయాలు కాగా.. వీరిని సిద్దిపేట ప్రభుత్వాస్పత్రికి తరలించారు. అందే వీరేశం చికిత్స పొందుతూ మృతిచెందాడు. వీరేశం గురువన్నపేట నుంచి శనిగరం బంధువుల ఇంటికి వెళ్తున్న క్రమంలో ఈ సంఘటన చోటుచేసుకుంది. కుకునూరుపల్లి పోలీసులు కేసు నమోదు చేసుకుని దర్యాప్తు చేస్తున్నారు.