పరిశ్రమ నుంచి మా గ్రామాన్ని కాపాడండి

మెదక్‌ కలెక్టర్‌కు రంగాయపల్లి గ్రామస్థుల వినతి

మనోహరాబాద్‌, అక్టోబరు 1: ఎంఎస్‌ అగర్వాల్‌ స్టీల్‌ పరిశ్రమ నుంచి గ్రామాన్ని కాపాడాలని మెదక్‌ జిల్లా మనోహరాబాద్‌ మండలం రంగాయపల్లి గ్రామస్థులు కలెక్టర్‌ను కోరారు. మంగళవారం మెదక్‌ కలెక్టరేట్‌ కార్యాలయంలో కలెక్టర్‌ రాహుల్‌రాజ్‌ను కలిసి ఫిర్యాదు చేశారు. ఈ సందర్భంగా వారు మాట్లాడుతూ గ్రామంలో 2004లో ఎంఎస్‌ అగర్వాల్‌ స్టీల్‌ పరిశ్రమను ఏర్పాటు చేశారన్నారు. గతంలో కొద్దిమేర ఉన్న పరిశ్రమ ప్రస్తుతం 25 ఎకరాలకు విస్తరించిందన్నారు. పరిశ్రమ గ్రామాన్ని ఆనుకుని ఉండడంతో రాత్రివేళల్లో శబ్దాలు, దుమ్ము, ధూళిని ఇష్టానుసారంగా వదులుతున్నారని చెప్పారు. ఈ విషయమై సోమవారం పరిశ్రమ ఎదుట ఆందోళన కూడా చేశామని పేర్కొన్నారు. ఈ పరిశ్రమలో ప్రస్తుతం 30 టన్నుల బట్టీ ఉండగా.. అధిక ఉత్పత్తి కోసం 200 టన్నుల బట్టీని నిర్మిస్తున్నారన్నారు. అధికారులు వెంటనే చర్యలు తీసుకుని మా గ్రామాన్ని కాపాడాలని కలెక్టర్‌ను వేడుకున్నారు. ఈ కార్యక్రమంలో చందర్‌గౌడ్‌, వెంకటేష్‌, శ్రీశైలం, మహేష్‌, మహిళలు పాల్గొన్నారు.