Peddapalli : మళ్లీ కూలిన ఓడేడు వంతెన గర్డర్లు

ముత్తారం, జూలై 2: పెద్దపల్లి జిల్లా ముత్తారం మండలం ఓడేడు, జయశంకర్‌ భూపలిపల్లి జిల్లా టేకుమట్ల మండలం గర్మిళ్లపల్లి గ్రామాల మధ్యలో మానేరుపై నిర్మాణంలో ఉన్న వంతెన గర్డర్లు మంగళవారం రాత్రి కుప్పకూలాయి. ఇటీవల కురుస్తున్న వర్షాలకు 17-18 పిల్లర్ల మధ్యలో ఉన్న రెండు గర్డర్లు ఒకవైపు వంగి నేలమట్టమయ్యాయి. గర్డర్లు కూలిన సమయంలో కింద ఎవరూ లేకపోవడంతో ప్రాణాపాయం తప్పింది. ఈ ఏడాది ఏప్రిల్‌ 22న రాత్రి ఇదే విధంగా 10-11 పిల్లర్ల మధ్యలో ఉన్న గర్డర్లు ఈదురుగాలులకు నేలమట్టమయ్యాయి. వంతెన లేకపోవడంతో రాకపోకల కోసం ఏర్పాటు చేసిన తాత్కాలిక రోడ్డుపై వెళ్లేవారు గర్డర్లు కూలడంపై భయాందోళనలు వ్యక్తం చేస్తున్నారు. ఇప్పటికైనా అధికారులు స్పందించి వంతెన నిర్మాణాన్ని పటిష్ఠంగా, త్వరగా పూర్తిచేయాలని కోరుతున్నారు.