Group-3 Exam: రేపటి నుంచి గ్రూప్‌-3 పరీక్ష
ABN , Publish Date - Nov 16 , 2024 | 03:49 AM
రాష్ట్రంలో ఆది, సోమ వారాల్లో గ్రూప్‌-3 పరీక్ష జరగనుంది. సుమారు 5.68 లక్షల మంది అభ్యర్థులు పరీక్ష రాసేందుకు 1,401 కేంద్రాలను ఏర్పాటు చేశారు. సుమారు 1,365 గ్రూప్‌-3 పోస్టుల భర్తీ కోసం గత ప్రభుత్వం నోటిఫికేషన్‌ జారీ చేసింది.
హైదరాబాద్‌, నవంబరు 15(ఆంధ్రజ్యోతి): రాష్ట్రంలో ఆది, సోమ వారాల్లో గ్రూప్‌-3 పరీక్ష జరగనుంది. సుమారు 5.68 లక్షల మంది అభ్యర్థులు పరీక్ష రాసేందుకు 1,401 కేంద్రాలను ఏర్పాటు చేశారు. సుమారు 1,365 గ్రూప్‌-3 పోస్టుల భర్తీ కోసం గత ప్రభుత్వం నోటిఫికేషన్‌ జారీ చేసింది. మొత్తం మూడు పేపర్లకు సంబంధించిన పరీక్షలను అభ్యర్థులు రాయాల్సి ఉంటుంది. 17న మొదటి సెషన్‌లో భాగంగా పేపర్‌-1 పరీక్షను ఉదయం 10 నుంచి 12.30 గంటల వరకు, రెండో సెషన్‌లో పేపర్‌-2 పరీక్షను మధ్యాహ్నం 3 నుంచి సాయంత్రం 5.30 గంటల వరకు నిర్వహించనున్నారు. 18న పేపర్‌-3 పరీక్షను ఉదయం 10 నుంచి 12.30 గంటల వరకు నిర్వహిస్తారు. పరీక్ష మొదలయ్యే సమయానికి 30 నిమిషాల ముందుగానే గేట్లను మూసివేస్తారు. అంటే.. ఉదయం సెషన్‌ పరీక్షలకు 9.30 గంటల లోపు, మధ్యాహ్నం సెషన్‌ పరీక్షకు 2.30 గంటల లోపు అభ్యర్థులు పరీక్ష కేంద్రంలోకి చేరుకోవాలి.
