BRAU బీఆర్‌ఏయూలో ఔట్‌ సోర్సింగ్‌ సిబ్బంది సేవలు నిలుపుదల

ఎచ్చెర్ల, డిసెంబరు 31(ఆంధ్రజ్యోతి): డాక్టర్‌ బీఆర్‌ అంబే డ్కర్‌ యూనివర్సిటీలో గతేడాది డిసెంబరులో ఔట్‌ సోర్సింగ్‌ విధానంలో నియమించిన 34 మంది ఉద్యోగుల సేవలను వర్సి టీ అధికారులు బుధవారం నిలుపుదల చేశారు. 2023 డిసెంబరు 31న అప్పటి వీసీ హయాంలో ఔట్‌ సోర్సింగ్‌ విధానంలో బోధనేతర సిబ్బందిని నియమించారు. ఏడాది కాలపరిమితికి వీరికి నియమించడంతో 2024 డిసెంబరు 31 నాటికి ఒప్పందం పూర్తయింది. వాస్తవానికి తాడేపల్లికి చెందిన ఓ సంస్థతో, వర్సిటీ అధికారులు అప్పట్లో ఒప్పందం కుదుర్చుకుని వీరిని నియమించారు. ఏడాది ఒప్పందం డిసెంబరు 31వ తేదీతో ముగుస్తుండడంతో ఈ నెల 23న వర్సిటీ అధికారులు తాడేపల్లికి చెందిన ఆ ఏజెన్సీకి లేఖకూడా రాశారు. కాగా, మంగళవారం విధులకు హాజరైన ఈ సిబ్బందికి బుధవారం నుంచి విధులకు హాజరుకానక్కర్లేదని తెలియడంతో ఒక్కసారి ఖంగుతిన్నారు. వర్సిటీ అధికారులను కలిసి తమ సమస్యను విన్నవించుకుని ఉద్యోగాల్లో కొనసాగిం చేలా చర్యలు తీసుకోవాలని కోరేందుకు ప్రయత్నించారు. నూతన సంవత్సరం వేడుక వేళ వీరి సేవలను నిలుపుదల చేయడంతో వీరంతా తీవ్ర ఆందోళన గురయ్యారు. వర్సిటీ అధికారులు పునరాలోచన చేసి తమను విధుల్లో కొనసాగించాలని వారంతా కోరుతున్నారు. ఈ విషయమై వీసీ ప్రొఫెసర్‌ కేఆర్‌ రజనితో ప్రస్తావించగా.. ఏడాది కాలపరిమితికి వీరిని నియమించారని, ఈ ఒప్పందం ముగియడంతో వీరి సేవలను నిలుపుదల చేసినట్టు చెప్పారు. పాలకమండలి సమావేశంలో చర్చించి తగిన నిర్ణయం తీసుకుంటామని స్పష్టం చేశారు.