సంతల్లో సంక్రాంతి సందడి!

కిటకిటలాడుతున్న ఏజెన్సీ సూపర్‌ బజార్లు

పండక్కి అవసరమైన వస్తువులన్నీ కొనుగోలు

గిరిజన రైతులు, వర్తకులతో పండగ వాతావరణం

జనవరి నెలాంత సంతలకు పండగ శోభ

(పాడేరు/ఆంధ్రజ్యోతి)

గిరిజనం సూపర్‌ బజార్లుగా భావించే వారపు సంతల్లో సంక్రాంతి సందడి నెలకొంది. సంతల్లో గిరి రైతులు, వర్తకులతో పండగ వాతావరణం నెలకొంది. గిరిజన రైతులు తమ అటవీ, వ్యవసాయ ఉత్పత్తులను సంతల్లోని విక్రయించి, ఆ డబ్బులతో పెద్ద పండగకు అవసరమైన వస్తువులు, సరకులు కొనుగోలు చేసుకుంటారు. ఏజెన్సీ పల్లెల్లో మాత్రం ఆదివాసీ సంప్రదాయం ప్రకారం పుష్యమాసం ఆఖరు రెండు వారాలు గిరిజనులు ‘పుష్య పొరోబ్‌’ పేరిట సంక్రాంతిని ఐక్యంగా, ఉత్సాహంగా జరుపుకొంటారు. దీంతో ప్రతి ఏడాది జనవరి నెలంతా ఏజెన్సీలోని వారపు సంతలు పండగ శోభతో కళకళలాడుతుంటాయి.

పండగ సామగ్రి కొనుగోళ్లతో సంతల్లో సందడి

గిరిజనులు తమకు అవసరమైన వస్తువులు, దుస్తులు, సామగ్రిని వారపు సంతల్లోనే కొనుగోలు చేస్తారు. పూజలకు అవసరమైన కొబ్బరికాయలు మొదలుకుని పిండి వంటల సరకులు, కొత్త బట్టలు, చెప్పులు, కుండలు, వంటపాత్రలు, కోళ్లు, మేకలు, తదితరలన్నీ కొనుగోలు చేసుకుంటారు. అలాగే సంతల్లో బట్టలు కొనుగోలు చేసి, అక్కడే కుట్టించుకునేందుకు టైలర్లు అందుబాటులో ఉంటారు. సంతల్లో ఆయా సరకులను విక్రయించే వర్తకులు జనవరి నెల ఎప్పుడు వస్తుందోనని వేయి కళ్లతో ఎదురు చూస్తారంటే అతిశయోక్తి కాదు. మైదాన ప్రాంతాల్లో సూపర్‌ బజార్లతో లభించేవన్నీ దాదాపుగా ఏజెన్సీ సంతల్లో లభిస్తాయి. దీంతో గిరిజనులు సంతలపైనే ఆధారపడతారు. దీంతో సంతల్లోనే సంక్రాంతి సందడి నెలకొంటుంది.

మన్యంలో సంతలు జరిగే ప్రాంతాలివే..

సోమవారం: పెదబయలు మండలంలో పెదబయలు, రూడకోట, చింతపల్లి మండలంలో అన్నవరం, జీకేవీధి మండలంలో ఆర్వీనగర్‌.

మంగళవారం: జి.మాడుగుల, చింతపల్లి మండలం లోతుగెడ్డ కూడలి, ముంచంగిపుట్టు మండలంలో బూసిపుట్టు.

బుధవారం: చింతపల్లి, డుంబ్రిగుడ మండలంలో కించుమండ, అనంతగిరి మండలంలో కాశీపట్నం, డముకు.

గురువారం: పాడేరు మండలంలో గుత్తులపుట్టు, జీకేవీధి, చింతపల్లి మండలంలో లంబసింగి.

శుక్రవారం: పాడేరు, డుంబ్రిగుడ మండలంలో అరకు, జీకేవీధి మండలంలో పెదవలస.

శనివారం: ముంచంగిపుట్టు, హుకుంపేట.

ఆదివారం: పాడేరు మండలంలో వంట్లమామిడి, మినుములూరు, అరకులోయ మండలంలో సుంకరమెట్ట, చింతపల్లి మండలంలో జర్రెల, జీకేవీధి మండలంలో ధారకొండ, కొయ్యూరు మండలంలో కాకరపాడు.