సినీ దర్శకురాలు గౌరీ రోణంకికి ఘన సన్మానం
ABN , First Publish Date - 2021-10-25T04:46:00+05:30 IST
విశాఖకు చెందిన తొలి మహిళా దర్శకురాలు గౌరీ రోణంకి తన తొలి చిత్రం ద్వారా విజయం సాధించడం గర్వకారణమని స్టార్‌ మేకర్‌ సత్యానంద్‌ అన్నారు.
మహారాణిపేట, అక్టోబరు 24: విశాఖకు చెందిన తొలి మహిళా దర్శకురాలు గౌరీ రోణంకి తన తొలి చిత్రం ద్వారా విజయం సాధించడం గర్వకారణమని స్టార్‌ మేకర్‌ సత్యానంద్‌ అన్నారు. పెళ్లి సందడి చిత్రానికి దర్శకత్వం వహించిన గౌరి రోణంకి తన తొలి చిత్రంతోనే విజయం సాధించడంతో ఆదివారం మహారాణిపేటలోని ఓ హోటల్‌లో ఏయూ థియేటర్‌ ఆఫ్‌ ఆర్ట్స్‌లో ఆమెతో పాటు చదువుకున్న విద్యార్థులు అభినందన సభ నిర్వహించారు. ఈ సందర్భంగా సత్యానంద్‌ మాట్లాడుతూ తన విద్యార్థి అత్యున్నత స్థానానికి వెళ్లడం ఆనందంగా ఉందన్నారు. దర్శకురాలు గౌరి మాట్లాడుతూ 15 ఏళ్లగా తాను పడ్డ కష్టానికి ప్రతిఫలం దక్కిందన్నారు. పది సంవత్సరాలు దర్శకేంద్రుడు రాఘవేంద్రరావు వద్ద పని చేశానని, ఈ చిత్రానికి ఇంత త్వరగా అవకాశం వస్తుందని ఊహించలేదన్నారు.
