కేంద్ర హోంశాఖ ఫేస్‌బుక్‌లో ప్రత్యక్షమైన బీర్ బాటిళ్లు, మిక్సర్

న్యూఢిల్లీ : కేంద్ర హోంశాఖ ఫేస్‌బుక్‌లో ఒక్కసారిగా కలకలం రేగింది. రెండు బీర్ బాటిళ్లు, మిక్సర్ తో ఉన్న ఫోటోను గురువారం పోస్ట్ చేశారు. దీంతో ఒక్కసారిగా కలకలం రేగింది. తుఫాన్ కారణంగా దెబ్బతిన్న బెంగాల్‌లో సహాయక చర్యలపై ఓ పోస్ట్‌లో ఈ ఫోటో పెట్టారు. ‘‘ప్రతి ఒక్కరూ విశ్రాంతి తీసుకోవాల్సిన అవసరం ఉంది. ఇదే రుజువు’’ అని ఫేస్‌బుక్ యూజర్ పేర్కొన్నారు. అయితే ఈ పోస్ట్ చాలా మందికి రుచించలేదు. ఈ పోస్ట్‌పై కొందరు కామెంట్లు కూడా చేశారు.

‘‘వెంటనే ఈ ఫోటోను తీసేయండి’’ అని ఒకరు కామెంట్ పెడితే.... మరొకరు ‘‘ఏందిది? దీనికి బాధ్యులెవరు? కఠిన చర్యలు తీసుకోవాల్సిందే’’ అని మరొకరు పోస్ట్ చేశారు. అయితే దీనిపై కేంద్ర హోంశాఖ స్పందించింది. ఈ పేజీని ఓ జూనియర్ ఉద్యోగి చూస్తారని, ఇది అనుకోకుండా జరిగిన పొరపాటు అని, పర్సనల్ ఫేస్‌బుక్ పేజీలో పోస్ట్ చేయబోయి, కేంద్ర హోంమంత్రిత్వ శాఖ పేజీలో పోస్ట్ చేయడం మూలానే ఇలా జరిగిందని వివరణ ఇచ్చింది.

ఈ పోస్టును 9:32 నిమిషాలకు తొలగించామని, సదురు ఉద్యోగి క్షమాపణలు కూడా చెప్పారని, లిఖిత పూర్వకంగా రాసిచ్చారని కేంద్ర హోంశాఖ పేర్కొంది. ఈ పోస్టు హోంశాఖ వెబ్‌సైట్‌లో 15 నిమిషాలు పాటు ఉంది. అయితే... హోంశాఖ మాత్రం సదురు ఉద్యోగిపై కాస్తంత సానుభూతితో ఉన్నట్లు సమాచారం. అనుకోకుండా జరిగిపోయిన పొరపాటు అని, ఉద్యోగి నిజాయితీతోనే ఒప్పుకున్నారు కాబట్టే సానుభూతితో ఉన్నట్లు సమాచారం.