ఇప్పటి ఆర్థిక వ్యవస్థ అనుకూలంగా ఉంది: గడ్కరీ

న్యూఢిల్లీ: ప్రస్తుత ఆర్థిక వ్యవస్థ అత్యంత అనుకూలంగా ఉందని, ప్రపంచం ఇప్పుడు చైనా కంటే ఇండియా వైపే చూస్తుందని కేంద్ర మంత్రి నితిన్ గడ్కరీ అన్నారు. ఇలాంటి అద్భుతమైన అవకాశాన్ని అందిపుచ్చుకోవడానికి తాము సంసిద్ధులమై ఉన్నట్లు ఆయన పేర్కొన్నారు. సోమవారం జరిగిన ఓ కార్యక్రమంలో ఆయన మాట్లాడుతూ ఈ వ్యాఖ్యలు చేశారు.

‘‘ఇప్పటి ఆర్థిక వ్యవస్థ పరిస్థితి ఎలా ఉన్నా మనకు అత్యంత అనుకూలంగా చైనాకు ప్రతికూలంగా ఉంది. ప్రపంచ దేశాలు చైనా కంటే ఇండియాపైనే ఆసక్తి చూపుతున్నాయి. ఇండియాకి ఎక్కువ పెట్టుబడులు రావడానికి ఇది అద్భుత అవకాశం. ఈ అవకాశాన్ని మేము అన్ని విధాల సద్వినియోగం చేసుకునేందుకు సిద్ధమయ్యాం. ఒక రకంగా చెప్పాలంటే ఇది అనుకోకుండా వచ్చిన అవకాశం. మరింత పోటీతత్వంతో మరింత నాణ్యతతో ఈ సదావకాశాన్ని వినియోగించుకుంటాం’’ అని గడ్కరీ అన్నారు.